¿POR QUÉ YE NECESARIA UNA ACCIÓN SINDICAL FEMINISTA?

L’acción sindical ye una ferramienta fundamental de llucha pa toles y tolos trabayadores. Defender los nuesos derechos, al traviés de delles táctiques (tantu defensives como ofensives), implica conocer el marcu llegal pel que nos mover, pero tamién delles estratexes (información, interlocución, denuncia, negociación, movilización) coles que consiguir los nuesos oxetivos.

Pola mor dello ye necesario establecer unos oxetivos a curtiu, mediu y llargu plazu -en función de les necesidaes de cada conflictu- asina como un marcu xeneral d’actuación que permitan dar una rempuesta rápida cuando yera necesaria.
Si cada realidá llaboral ye distinta, y nun ye lo mesmo un conflictu colectivu qu’unu individual, tamién ye distintu l’enfoque en función del xéneru de la persona (o persones) que vive’l conflictu.

En dellos testos y espacios d’alderique ficimos por señalar les discriminaciones a les que mos enfrentamos les muyeres nel mundu llaboral. Por nomar dalgunes: les diferencies salariales, la segregación ocupacional horizontal y vertical, la contratación a tiempu parcial, l’acosu sexual y por razón de sexu, la discriminación por maternidá, la menor cotización y prestaciones económiques por xubilación, la doble o triple xornada… A pesar d’estes problemátiques específiques, la rempuesta -inclusive sindical- que recibimos dacuando, ye que les diferentes lleis poles que se rixe l’Estáu inclúin la igualdá d’home y muyer, anque sabemos qu’eso nun garantiza los nuesos derechos.

Sicasí, nel ámbitu llaboral enfrentámonos a la dificultá enorme de detectar les situaciones y normatives falsamente neutrales que tan empobinaes hacia la desigualdá y la discriminación. Los convenios y alcuerdos colectivos nun suelen cuestionar la organización socioeconómica. El fechu de vivir nuna sociedá capitalista y patriarcal tampoco forma parte de los análisis y enfoques de l’acción sindical, polo qu’al falar d’igualdá de xéneru nel ámbitu llaboral alcontramos, munches vegaes, rempuestes xenériques que nun dan cola midida específica que precisamos anque pongan tol esfuerzu y bones intenciones posibles. Si la llucha polos derechos de los trabayadores ye difícil, la de les trabayadores complícase un pocu más…

Estes, y otres, reflexones llévennos a dar un pasu más nel trabayu feminista que tamos tratando de desendolcar dientro’l sindicatu y a proponer una asesoría d’acción sindical feminista pa toes aquelles compañeres que la demanden.
Somos conscientes de que nos queda muncho por deprender, munchu trabayu por faer y, pa ello, esperamos cuntar col sofitu y la esperiencia de munches compañeres y compañeros que, primero que nós, vinieron desendolcando esti llabor.
L’asesoría va tar abierta a consulta los segundos y cuartos miércoles de mes nel llocal de CSI Uviéu (Hermanos Menéndez Pidal, 15 bx). Les cites van recoyese por teléfonu (985 296 964).
Sicasí, en casu de necesidá (cuidaos, movilidá…), tamos dispuestes a movenos y faer la consulta n’otres llocalidaes. Nel casu de Xixón, disponemos amás d’un espaciu específicu nel que realizar la consulta