9 D’OCHOBRE, ELLEICIONES SINDICALES NA UNIVERSIDÁ D’UVIÉU

Tres años de trabayu nel Comité d’Empresa, con representación única nel Colexu 2 (Especialistes y non cualficaos), por primer vegada la Corriente Sindical d’Izquierda presenta candidatura nel Colexu 1 ente los que tan representaos los docentes e investigadores con contratu llaboral.

Mientres la última llexislatura, miembros d’esi colectivu punxéronse en contactu con esta seición sindical faciéndonos partícipes de la so problemática. Esto fízonos garrar concencia de la precariedá existente nel mundu de la investigación y la docencia universitaria. Más carga docente por menos salariu, convocatories pa contratos predoctorales que se retrasen constantemente, imposibilidá d’accesu a ciertes llínies d’ayudes, contrataciones que rocen la illegalidá pa cubrir hores de clase… constitúin situaciones habituales nuna institución que tendría que ser excelente tamién nes rellaciones llaborales.

Colos vuestros votos, dende la Corriente Sindical d’Izquierda vamos lluchar por camudar esta situación, representando a los profesores e investigadores, que sostienen parte del sistema universitariu y supuestamente son la elite intelectual de la nuesa comunidá autónoma, anque esto nun se espeye nes sos condiciones llaborales. ¡Vamos consiguilo!

¡POR UNA UNIVERSIDÁ DE CALIDÁ, POL FIN DE LA PRECARIEDÁ!

¡VOTA CORRIENTE SINDICAL D’IZQUIERDA NA UNIVERSIDÁ D’UVIÉU!