CSI EN ARCELORMITTAL FARTOS DE MILONGUES

Nel día de güei (18/09/19), esconsoñemos cola anuncia d’un nueu ERTE nel Tren d’Alambrón, un nueu capítulu que acrecienta la fartura e indignación de gran parte de la plantiya.

Nun vamos dar por buenos los argumentos de la empresa de que hai falta de pidíos, cuando la propia empresa nun apurre datu dengún y simplemente nos pide que faigamos un actu de fe y deamos por ciertos los sos datos.

Hai que recordar tamién que tamos dientro la negociación de conveniu y con un plan de productividá pendiente que quier llevase per delantre 200 empleos en llargos, colo que la empresa va utilizar toles sos armes pa inclinar la balanza del so lláu.

Tamos fartos de la política de chantaxe que usa ArcelorMittal en toa triba de negociaciones.

Tamos fartos de la política del mieu que afalen determinaes organizaciones sindicales mediante los sos “visitadores mañaneros” col únicu envís de facé-y caldu gordu a la empresa.

Tamos fartos d’ERTES por falta de pidíos cuando la empresa lu aplica en fines de selmana y festivos pa dexar fuera d’ellos a tola XEFATURA y xornada normal y dexando n’entedicho que la situación nun ye polo menos tan grave.

Tamos fartos que la dirección del taller, en determinaos puestos, diga quien va d’ERTE de forma soxetiva y ensin dengún criteriu.

Tamos fartos de batir récords de producción y de trabayar a ritmos altos baxo’l “llátigu” pa acabar nel ERTE al día siguiente.

Tamos fartos de la falta de formación de la mayoría de la plantiya col argumentu de que nun hai personal, pa dempués acabar nel ERTE.

Tamos fartos de que los “voceros del patrón” nos metan mieu cola situación actual y que’l futuru va ser peor pola parada d’un fornu, cuando toos sabemos que traemos Palanquilla d’Alemania.

Tamos fartos de que a una multinacional en beneficios se-y siga prorrogando l’ERTE añu tres añu por una mayoría sindical.

En definitiva TAMOS FARTOS DE MILONGUES.