CSI ARCELORMITTAL A VELES VINIR, ÉNTE’L PIESLLE DE LES BATERÍES.

Como yá sabéis l’añu pasáu entamemos una campaña, con una ronda de contautos colos estremaos grupos políticos nos ayuntamientos d’Avilés y Corvera, pa denunciar la falta de mantenimientu y el deterioru de les instalaciones y desplicar la perda de puestos de trabayu que representa pa les comarques el pieslle de bateríes y pidir un esfuerzu inversor en nueves llínies de negociu que palien dicha perda de puestos de trabayu. Pero a mediaos d’ochobre asocedió l’incendiu y preferimos posponer dicha campaña.

D’otru láu, énte’l ca vegada más inmediatu pieslle de les bateríes, queremos espresar que dende’l primer momentu vinimos denunciando l’hermetismu y la falta de tresparencia que la empresa tá teniendo respeutu a esti asunti. Y ellí onde tuvimos presencia pidimos que’l procesu se llevare d’una manera xusta y lo menos dañina posible, que los puestos nun se dieren d’una manera suxetiva y hubiere unos criterios claros, pidimos a la empresa que cesare de toes toes con esti comportamientu que namás xenera duldes sobre’l nuesu futuru llaboral.

Vemos necesario dexar de dir vendiendo cuentos y medies verdaes, que nun faen otro que semar incertidume nun momentu complicáu, entendemos como dalgo necesario’l facer una asamblea de taller pa informar pormenorizadamente de too y conxuntamente buscar ciertos compromisos de la empresa.

Entendemos que hai munches duldes, munches entrugues ensin resolver, que hai un gran númberu d’eventuales a los que se-yos tán dando informaciones contradictories, que gran parte de la plantiya tres arrimar l’hombru llegando a cambiar les sos vacaciones, agora a la vuelta de la esquina, atópense como rempuesta que van d’ERE.

Poro entendemos que hai que pasar del veles vinir, de les improvisaciones de la empresa y desixir compromisos e información veraz, que dempués se cumpla.

Namás el grupu protexe, ensin la to implicación esti procesu va ser una rifa.