VALIO DE FALSES AUTONOMES CSI

INSPEICIÓN DE TRABAYU ESTIMA LA DENUNCIA DE CSI Y RECONOZ A LES GLOVERS COMO FALSES AUTÓNOMES

La denuncia presentada pola Corriente Sindical d’Izquierda fai arrancar una investigación per parte d’Inspeición de Trabayu y Seguridá Social d’Asturies qu’acaba determinando la rellación de los y les trabayadores de Glovo como llaboral, comunicando d’oficiu la so alta nel réxime xeneral de trabayadores y estendiendo a la empresa acta de lliquidación pal abonu de les cuotes non pagaes.

Nel marcu de la campaña “Valió de falses autónomes” la CSI d’Uviéu presentó nel mes de xunu de 2018 una denuncia detallando les condiciones de trabayu ufiertaes pola empresa de repartu Glovo, recién instalada n’Asturies, que foi tenida en cuenta pola Inspeición de Trabayu y Seguridá Social d’Asturies entamando aiciones d’investigación ente la empresa y requiriendo información a los y les trabayadores.

La campaña “Glovo esplota falses autónomes, arrevienta la precariedá” trabayó paralelamente a la denuncia mediante pega de cartelos y pancartes, concentraciones, un videu nel que desplicaba la situación llaboral de los “glovers” y conceyos con trabayadores d’Uviéu y Xixón. El pasáu mes de febreru, además, asistióse llegalmente a un trabayador despedíu por Glovo, consiguiendo la sentencia favorable al trabayador nel Xulgáu 1 de lo Social de Xixón, reconociendo la so calidá d’empleáu y polo tanto “falsu autónomu”, sentencia que s’alcuentra a la espera de ser declarada en firme al ser recurrida pola empresa.

D’esta manera, teniendo Inspeición de Trabayu requerida documentación a la empresa, citando a repartidores pa mantener entrevistes y recabar documentación y faciendo delles visites a les oficines de Glovo, el Subinspeutor Llaboral d’Empléu y Seguridá Social comprueba que “concurren característiques propies del contratu de trabayu na prestación de servicios que vienen desarrollando los repartidores por cuenta de la empresa GLOVOAPP23 SL, al acreditase la dependencia y ayenidá.”

Asina, determínase “la inclusión de dichos repartidores nel Réxime Xeneral de la Seguridá Social (RXSS)” y, nun teniendo la empresa daos d’alta a les trabayadores como repartidores nin teniendo cotizao por elles en dichu réxime, remítense a la Tesorería Xeneral de la Seguridá Social “comunicaciones d’altes d’oficiu de los llamaos glovers nel RXSS” estendiendo a la empresa “Acta de Lliquidación por falta d’alta y cotización”.

La Corriente Sindical d’Izquierda d’Uviéu considera la resolución d’Inspeición un ésitu en favor de les repartidores y les sos condiciones de trabayu, asina como una piedra nel camín pa la creciente precarización del trabayu n’Asturies, un avisu pa otres empreses que pretenden aterrizar n’Asturies col modelu de negociu basáu nes falses autónomes.

VALIÓ DE FALSES AUTÓNOMES

ARREVIENTA LA PRECARIEDÁ