CSI EMA

El xulgáu de lo social nº 1 de Xixón declara la nulidá y dexa ensin efectu la convocatoria pa la seleición d’un responsable de Recursos Humanos.

La Direición de la EMA convocó esta plaza por primer vegada en mayu de 2017, algamando’l puestu una persona que robló un contratu indefiníu y que foi despedía seis meses dempués porque, sigún la direición de la empresa, “nun superó’l periodu de preba”. La empresa dexó constancia nel acta d’un aconceyamientu col Comité d’empresa que “se equivocó nel perfil que se buscaba pa cubrir esi puestu”.

Asina que n’abril de 2018 volvió a convocase’l puestu de responsable de Recursos Humanos, que remató con un contratu relevu de calter definitivu. El procesu selectivu careció del mínimu de tresparencia desixible al sector públicu, sigún se desprende de la sentencia. Dáse la circunstancia de que esti segundu y definitivu contratáu, que sí pasó’l periodu de preba de seis meses, ye l’esposu de la xerente de la Empresa Municipal de la Vivienda (Emvisa), Elena Sevilla, «una persona de máxima confianza» de l’alcaldesa Carmen Moriyón y directiva de Foro Gijón, sigún denunció nel so día, públicamente, César González, conceyal del PSOE.

La sentencia “declara la nulidá de la convocatoria, dexándola ensin efectu” y “conderga a la EMA (y al trabayador demandáu) a tar y pasar per tal afirmación” (…) “reponiendo la empresa la situación al momentu inmediatamente anterior al referíu procesu selectivu”.