PRIMERU DE MAYU. CONCENCIA Y LLUCHA DE CLASES

*Hai una guerra de clases y una va ganando

Na época de mayor desendolcu tecnolóxicu, cuando se tendría que tar falando de repartu de trabayu, de reducción de la xornada llaboral, de más tiempu d’ociu, de cómo distribuyir los recursos que se xeneren pa que denguna persona pase necesidaes… atopámonos con una clase privilexada, la clase dominante, que namás representa’l 1% de la población y que se apropia de la mayoría d’esos recursos, los xestiona pal so propiu porgüeyu y provoca que les nueses vides empeoren, al empar que hipoteca les d’unes xeneraciones futures que van vivir peor que les y los sos antecesores.

* Somos más probes y tenemos menos drechos 

L’informe añal de recaudación tributaria del añu 2017 indica que les rentes empresariales xorrecieron el doble que les del trabayu, que ye la parte esencial de les rentes de los hogares. 

Les rentes del capital y les empresariales incrementen y les de la clase obrera amenorguen, ensin que se perciba cambiu dengún nesta dinámica, nin en cuantu a rentes, nin en cuantu a drechos llaborales y sociales. Les socesives reformes llaborales y lleis represives confírmenlo. 

* Róbennos

La so alternativa xenera una sociedá desigual, de probes que, en munchos casos, nin teniendo un empléu cubren les sos necesidaes básiques. Trabayamos por salarios de miseria mentantu otros y otres roben, corrompen y viven na opulencia a costa nuestra. Un exemplu sedría la banca onde l’Estáu inxectó 77.000 millones d’euros y va perder más de 60.000, que tendríen que destinase a fines sociales. Esto ye un robu, yá que colos nuesos impuestos cubrimos les sos supuestes perdes.

* Engáñennos

La so alternativa guíanos a trabayar por salarios de miseria, a tener una educación deteriorada, una sanidá deficiente cuya deriva ye la privatización, y a percibir unes pensiones que, en munchos casos, nun lleguen nin pa prender la calefaición. Por embargu, esa clase dominante utiliza los medios de comunicación de la so propiedá, pa dar una falsa imaxen de bientar social y pa facenos creer que tolo que asocede ye un mal menor, que nun hai alternativa. 

Ye posible construyir una sociedá más xusta e igualitaria, pero escaecimos d’ónde venimos y hai una gran desorientación de pa ónde vamos.

Toes y toos somos clase obrera, toles y tolos que trabayamos por cuenta ayena somos lo mesmo, y ente toes y toos ye posible construyir un modelu social más xustu e igualitariu si recuperamos del escaezu los nuesos oríxenes como clase, si garramos concencia de la nuesa condición social y de que realmente hai una lucha que, de momentu, vamos perdiendo, pero que otres xeneraciones anteriores a base d’unidá y llucha, consiguieron ganar.

¿Por qué nun vamos algamalo? ¿Por qué nun podemos construyir un mundu más xustu e igualitariu? ¿Por qué vamos resignanos? ¿Por qué vamos rindinos?

* Concencia de clase, solidaridá y llucha pa construyir el futuru.

Ensin concencia, ensin solidaridá y ensin llucha, siguiríemos trabayando 12 hores diaries, nun habría escueles, nun habría sanidá y nun tindríemos pensiones. Too se ganó lluchando.

Hai una clara llucha de clases y hai una que va ganando a la que nun-y interesa que se fale d’ello, porque si garramos concencia del fechu de que tán apropiándose de les nueses vides y les de les nueses fíes y fíos, igual nos da por axuntar fuerces, igual nos da por pasar de la pasividá a l’aición, del desencantu a la ilusión, de la impotencia a velo too posible.

La concencia de pertenencia, la solidaridá y la llucha ye lo que promovió cambios a lo llargo la hestoria y si recuperamos esos tres factores, si los facemos de nueso de nueu, si los ponemos en valor, si somos quien a tener claru l’oxetivu, vamos ganar. Porque nun hai drechu a que les persones vivan permanentemente angustiaes, porque somos más y porque la razón tá del nuesu lláu. 

LLUCHA DE CLASES

CINCO FRENTES D’AICIÓN

– Llaboral: Escontra la Reforma Llaboral, la precariedá, la pérda de drechos y la merma del poder alquisitivu, escontra los accidentes llaborales y les y los sos responsables, que causen cientos de muertes al añu.

– Social: Escontra la desigualdá social, la probeza enerxética, los desagospios y la migración forzada.

– Represión: Escontra un códigu penal coercitivu, escontra les lleis represives, escontra la represión llaboral y a favor de los drechos y llibertaes fundamentales.

– Política: Escontra les polítiques neolliberales y autoritaries, pola sostenibilidá, la distribución de la riqueza, l’autodeterminación y l’autoxestión.

– Feminismu: Por una Igualdá efectiva de drechos y oportunidaes, escontra la violencia machista y pola consecución de polítiques sociales que garanticen la conciliación familiar y llaboral.

ESCONTRA LA DESIGUALDÁ SOCIAL
CONCENCIA COLECTIVA, SOLIDARIDÁ, APOYU MUTUU Y LLUCHA