MATADERU CENTRAL

ÉNTE LES RECIENTES DECLARACIONES DEL PROPIETARIU DEL MATADERU CENTRAL D’ASTURIES, LA CORRIENTE SINDICAL D’IZQUIERDA (CSI), MANIFIESTA LO QUE VIÉN DARRÉU:

Los antiguos trabayadores del Mataderu de Noreña tuvieron enzarraos más de dos años nes instalaciones de la empresa, reivindicando la so continuidá dada la importancia pa Noreña, los conceyos de la redolada y Asturies en xeneral y to4gando cola so presencia’l desmantelamientu y el saquéu de diches instalaciones.
Gracies a estos trabayadores, a los que se recurrió n’abondes ocasiones pa facilitar la nueva apertura, y al so enzarru, el nueu propietariu fízose cargu d’unes instalaciones en perfectu estáu, circunstancies que fueron reconocíes públicamente na prensa por dichu propietariu que manifestó en reiteraes ocasiones lo mesmo nos medios de comunicación que delantre les alministraciones públiques el so compromisu de recolocar a los trabayadores del antiguu Mataderu que, amás d’algamar la conservación de les instalaciones, cuntaben con una amplia esperiencia llaboral en dichos trabayos.
Pa llevar alantre esa reincorporación, los trabayadores del antiguu Mataderu presentaron la solicitú y el currículu que se-yos desixó pela parte’l nueu propietariu a últimos de 2017, previamente a la reapertura, que-yos manifestó que en breve sedríen llamaos a trabayar.

Pesie a eso, más d’un añu dempués de les sos promeses de recolocación, el nueu propietariu del Mataderu Central incumplióles, nun contactó cola mayoría, y sigue incumpliéndoles: de los antiguos trabayadores, a fecha de güei, namás recolocó a 10, de los 30 colos que cuenta.
Amás d’incumplir los sos compromisos y mentir públicamente alrodiu’l númberu d’extrabayadores recolocaos, que cifraba nun 90% de la plantiya actual, y pendientes de recolocar, l’actual propietariu del Mataderu Central tá llevando alantre una intolerable campaña pública de difamación y descalificaciones escontra dalgunos d’estos trabayadores que col so enzarru de más de dos años algamaron evitar el desmantelamientu y el saquéu de les instalaciones de la empresa, y escontra quienes sofitamos estes reivindicaciones.

Dende la CSI denunciamos esta situación d’inxusticia y esta campaña de difamación y siguimos desixendo’l cumplimentu del compromisu de recolocación de los antiguos trabayadores del Mataderu.

¡Recolocación de los antiguos trabayadores del Mataderu Central!
¡Que se cumpla lo prometío!