CSI MOCEDÁ

Pasaos unos díes del 8M, somos quien a facer una pequeña valoración de lo que foi la Fuelga Xeneral Feminista esti añu. Otra vegada, los movimientos feministes tornen a amosase como’l principal pegoyu sobre’l que vamos poder articular una rempuesta viable escontra les estremaes problemátiques que mos amenacen como sociedá: la precariedá, el retrocesu de los drechos sociales, políticos y llaborales, la fola reaccionaria na que ta sumiéndose toa Europa…

Nun fizo falta más que salir a la cai el 8 de marzu p’acolumbrar que, nesti ciclu políticu y social que paez qu’entama, el feminismu ye’l principal exe vertebrador y movilizador de la llucha na cai y casique l’únicu movimientu que nun ta nuna dómina de retrocesu.

Dende 2012 nun teníamos una Fuelga Xeneral. Y tuvo que ser el movimientu feminista’l que punxera enriba la mesa l’añu pasáu la necesidá de facer usu d’esta ferramienta otra vuelta. L’ésitu de la movilización n’Asturies dexa ensin dubia nenguna a cualquiera que quiera analizalu col mínimu rigor; y anque nel aspeutu puramente llaboral nun algamara tola repercusión que mos prestaría, nun puede xulgase como otra Fuelga Xeneral al usu. Primeramente, porque nun lo ye, pola mor de que torna relevantes dellos aspeutos qu’otres vegaes son invisibilizaos dafechu (cuidaos, consumu, problemátiques venceyaes a situaciones de persones lgtbi, migrante, racializá); y pa siguir, porque, nun lo escaezamos, ye la primer vegada qu’una fuelga xeneral se convoca ensin contar col sofitu de los dos sindicatos mayoritarios.

Sicasí, fai falta trabayar pa que la prósima convocatoria algame’l puxu que necesitamos nos ámbitos nos que nun ta teniendo tanta repercusión. Poro, el camín ye siguir confiando nes compañeres del sindicatu, que lleven años trabayando escontra vientu y marea p’algamar lo que toes vivimos el vienres. A elles, tol nuesu agradecimientu por tirar d’esta convocatoria p’alantre, por tol trabayu desendolcáu nunos tiempos tan curtios. Tamién a toles que currasteis nos espacios de cuidaos.

Puxa la llucha feminista!
Puxa la Fuelga Xeneral!