CSI Vauste

Sindicalistes de CSI en Vauste (antigua Tenneco) aconceyaron esti miércoles 28 de payares en Bruseles por mediación del grupu parllamentariu européu de PODEMOS cola Comisión d’Industria del Parllamentu Européu y con delles y dellos europarllamentarios y van intentar aconceyar cola direición de Tenneco n’Europa.

A dichu aconceyamientu asistieron tamién el responsable del Fondu Européu d’Adaptación a la Globalización (FEAG) y espertos de Xestión Compartía del Fondu Social Européu.

Nacho Fuster, secretariu xeneral de la CSI y miembru’l comité d’empresa de Vauste y Fernando Álvarez, delegáu sindical de la CSI en Vauste ficieron entrega a les y los miembros de dicha Comisión d’Industria del Parllamentu Européu d’un ampliu dossier (173 páxines) alrodiu los incumplimientos del alcuerdu robláu pol fondu utre Quantum Capital Partners nel momentu de l’alquisición de Tenneco y pidieron que se faiga públicu l’alcuerdu CMA-DELOITTE ente Tenneco y Quantum, onde se afita la inversión en maquinaria que había efectuase pa garantizar el futuru de la fábrica de Xixón y, a día de güei, nun tá efectuándose.

Lo mesmo nesi aconceyamientu, que nes que se llevaron alantre con estremaes europarllamentaries y europarllamentarios asina como na que van intentar caltener cola direición europea de Tenneco, los sindicalistes de la CSI en Vauste van defender la necesidá de que se asegure de forma fehaciente la viabilidá y el futuru de la fábrica de Xixón, ensin tar a espenses de declaraciones de buenes intenciones ensin dengún conteníu concretu.

A la direición de Tenneco pretenden treslladá-y el so esmolecimientu pola posibilidá que al paecer tá baraxándose d’afitar un plan de futuru con retayos d’empléu y la so desixencia de proyeutu a llargu plazu pa tola plantiya actual de Vauste.

Los dos trabayadores de Vauste y sindicalistes de la CSI fueron sancionaos nos últimos meses pola so actividá reivindicativa y la so desixencia de viabilidá de la empresa.

Lo mesmo Nacho Fuster que Fernando Álvarez cumplieron trenta díes de suspensión d’empléu y sueldu acampaos delantre la fábrica y Nacho Fuster volvió a ser sancionáu con otros sesenta díes de suspensión d’empléu y sueldu a cumplir dende marzu de 2019.

Estes sanciones tán pendientes del recursu presentáu polos trabayadores énte los tribunales de lo social.