Comunicáu de la seición sindical de CSI en TUA

Les y los trabayadores de la empresa municipal de tresporte urbanu d’Uviéu, TUA, vamos dir a la fuelga los díes 4, 13, 18 y 27 d’avientu y del 2 al 4 de xineru.

Les razones son l’incumplimientu reiteráu pela parte de la empresa d’alcuerdos en materia llaboral, como los descansos en xornaes continuaes o l’amenorgamientu de la plantiya estable, lo que lleva a que a día de güei tengamos una eventualidá con condiciones económiques y llaborales precaries dafechu, con sueldos d’ente el 25% y el 40% perbaxo al de les y los trabayadores fixos y ensin poder llevar una vida familiar “NORMAL”, yá que la empresa los tienen a la so total dimposición comunicándo-yos d’un día pa otru cuálu va ser el so serviciu y cuándo-yos va tocar descansar, y sí, ye la mesma empresa que presume d’acreditada como Empresa Familiarmente Responsable dende l’añu 2013, nun sabemos ónde sedrá eso, n’Uviéu dende llueu que NON!!!!.

Les y los conductores de TUA desiximos el cumplimientu de los alcuerdos que’l 2015 punxeron fin a la nuesa ultima fuelga, queremos tamién que se cumpla la llei en materia de descansos, que afita media hora de descansu pa les y los conductores que trabayen 6 hores y 45 minutos pa les y los que trabayen 8 hores.

Denunciamos tamién la situación de precariedá que sufrimos TOLA plantiya de conducción, al nun disponer de servicios hxiénicos na cabecera y tener que depender de los chigres (cuando los hai) pa facer les nueses necesidaes fisiolóxiques.

Toos estos asuntos intentaron negociase en munches ocasiones pela parte’l comité d’empresa, algamando siempre la mesma rempuesta pela parte de la direición de TUA “Nun hai nada que negociar”, enllenando los xulgaos de demandes que SIEMPRE acabamos ganando. La última, consiguir que les nueses compañeres y compañeros xubilaos por enfermedá recuperaren el so drechu a pase y nub tener que pagar cuando suban al autobús, talu como ruinmente pretendía la empresa.

Tamién denunciamos que la empresa quier centrar l’atención de la ciudadanía nel alcoholock, el sistema de control d’alcoholemia llantáu ENSIN ALCUERDU dengún cola RLT de les y los trabayadores nos nuevos autobuses y que dalgunes conductores se negaron a utilizar, y por ello se-yos abrió un espediente por falta pergrave, namás por desixir que se llegue a un alcuerdu col comité d’empresa y por ser un sistema que NUN tá nin homologáu, nin certificáu, nin ufre dengún tipu de garantía pa les y los trabayadores, nin de seguridá, nin de confidencialidá, nin d’efectividá. Tampoco existe llexislación nel Estáu español al respectu y paeznos inregular dafechu soplar con un aparatu que nun se sabe si falla o non, y que amás nun hai presente personal sanitariu, nin miembru del comité, como estipula’l nuesu Conveniu Colectivu del Tresporte per Carretera d’Asturies, nel anexu nº2 incluyíu na última negociación del Conveniu del nuesu sector, sobre controles d’alcohol y drogues onde vienen recoyíes.

El próximu llunes 26 van aconceyar nel SASEC d’Uviéu la Representación Llegal de les y los Trabayadores y la Direición de TUA, pa intentar desconvocar la fuelga. Dende esta seición sindical confiamos nuna resolución del conflictu onde se consigan tolos puntos que se reclamen, asina como la retirada de los espedientes disciplinarios entamaos esta selmana.

Dende esta seición sindical amosamos tou’l nuesu sofitu y ufrimos l’ayuda que necesiten a les y los miembros del Comité d’Empresa presentes en dicha negociación, asina como’l nuesu sofitu incondicional a les compañeres sancionaes por defender los drechos llaborales de toles y los trabayadores de la empresa.