Sigue la persecución a la CSI pela parte de la Direición de VAUSTE

Nueva sanción de 60 díes de suspensión d’empléu y sueldu a Nacho Fuster, trabayador de Vauste y secretariu xeneral de la CSI, pol so llabor sindical.

 

Una vegada que’l xulgáu refugó la denuncia penal que la direición de Vauste (antigua Tenneco) presentara escontra Nacho y Zape, trabayadores de la fábrica y militantes de la CSI, esa direición comunicó l’apertura d’un nueu expediente disciplinariu escontra Nacho, en base a una serie de grabaciones efectuaes en distintos aconceyamientos, convenientemente editaes y sacaes de contextu.

Diches grabaciones fueron apurríes nel so momentu como ampliación de la denuncia penal que sobreseyó’l xulgáu, ensin algamar la pretensión de que fueren consideraes delitu.

A la direición de Vauste-y da igual.

Agora, sancionaron a Nacho con dos meses de suspensión d’empléu y sueldu, a cumplir dende’l mes de marzu de 2019.

Esta nueva sanción súmase a la de trenta díes de suspensión d’empléu y sueldu impuesta a Nacho y Zape, pendiente de xuiciu, que los compañeros cumplieron acampaos delantre la fábrica, amosando que se equivocan quienes creen que la represión va facé-yos callar.

Lo que pretende la direición de Vauste, siguiendo instrucciones del fondu utre Quantum Capital Patners, ye amedrentar a les y los trabayadores mediante la persecución al sindicalismu combativu.

Y pa eso, cualesquier cosa-yos val.

Seya o nun seya llegal.

Seya o nun seya inmoral.

O como ye esti casu, anque seya illegal e inmoral al empar.

Estos empresaurios quieren volver, en pleno sieglu XXI, a les rellaciones llaborales del XIX.

Con curioses (o non tanto) complicidaes, amás.

La del restu’l comité d’empresa de Vauste, por exemplu.

La CSI ye’l sindicatu más votáu en Vauste.

La CSI ye l’únicu sindicatu que desixe compromisos reales de futuru pa la fábrica, con garantía pa los puestos de trabayu de tola actual plantilla.

Mentantu, CCOO, UGT y USO aplauden coles oreyes los discursos grandilocuentes de la direición ensin dengún respaldu documental y, nel colmu de los colmos, dedíquense a difamar a los compañeros de la CSI y a sofitar la estratexa represiva de la direición de Vauste.

Énte este nueva sanción, tendrán dalgo que dicir?

Dalgo en defensa de los compañeros perseguíos, claro.

O volveremos a ver la obscena e indisimulada alegría d’estos supuestos sindicalistes énte l’ataque de la direición escontra quienes peleen polos drechos de toes y toos?

Nun cansen de traicionar una y otra vuelta?

Nun creen que yá tá bien?

En tou casu, faigan lo que faigan, nin la direición de Vauste nin les y los sos cómplices sindicales van algamar los sos propósitos.

Nun van consiguir callar a Nacho y a los compañeros de la CSI de Vauste.

Nun van consiguir derrotar al sindicalismu coherente y combativu.

La verdá va prevalecer frente a les mentires, la represión y les campañes de difamación escontra quienes lluchen.

La solidaridá y l’apoyu mutuu impondránse al atropellu y al abusu de poder.

Escontra la represión y polos drechos de les y los trabayadores.

Que viva la llucha de la clase obrera!