El Xulgáu de la Social de Xixón falla escontra´l Corte Inglés

La trabayadora gana'l so derechu a la xornada amenorgada

La sentencia, asoleyada a finales d’ochobre y fecha pública fae escases feches, declara’l drechu de la trabayadora, defendía pola lletrada Marta María Rodil, al cambiu de turnu ordinariu nel siguiente supuestu:

La trabayadora, contratada na empresa en turnos consecutivos de mañana y de tarde, acababa de finalizar un períodu de más de diez años de duración, de reduición de xornada por cuidáu de menor tres el nacimientu de la so primer fía, onde se-y asignara’l turnu exclusivu de mañanes. En 2009 solicita nueu periodu por segunda fía n’idéntiques condiciones. La rempuesta de la empresa consistió na denegación con una única causa, cambiu llexislativu pol que nun tién obligación de caltener el cambiu de turnu exclusivamente al de mañana, que pretendía la trabayadora.

Razona la sentencia que, si bien ye cierto que la llexislación vixente en materia de conciliación de vida familiar señala, con calter xeneral, que la reduición tién que concretase n’horariu habitual, nesti casu, el conveniu coleutivu vixente, abre la posibilidá de modificar el sistema de turnos asignáu a la trabayadora al entamu de la so rellación llaboral si la empresa nun xustifica convenientemente les causes organizatives o productives que asina-y lo impiden.

Asinamesmo, continúa la sentencia, argumentando como significativu, el fechu de que les característiques del puestu de trabayu que vinía ocupando la trabayadora na so anterior situación de reduición de xornada por fíu menor, onde se-y asignara exclusivamente’l turnu de mañana, hubiere tao ocupando de manera continuada puestos n’estremaes seiciones de la empresa, polo que la califica de polivalente y poro, xustifica la posibilidá d’apurrir servicios exclusivamente nel turnu escoyíu pola trabayadora.

Dende la CSI consideramos de suma importancia esta sentencia, yá que pon de manifiestu, una vegada más, el llaváu d’imaxen d’empreses como El Corte Inglés que, pesie a tener Planes d’Igualdá, vulneren una y otra vuelta’l drechu de les trabayadores a la conciliación llaboral y familiar.