La CSI dexise la continuidá de la minería n’Asturies más alló del 31 d’avientu

Asturies sufre una situación de reconversión industrial y económica hacia la nada dende fae delles décades, con episodios constantes de pieslles d’empreses que a vegaes lleguen a picos álxidos como l’actual, col reciente anunciu del despíu de tola plantilla d’ALCOA y l’inminente fin del seutor de la minería. Too ello respuende a los intereses del capitalismu global, que arrasa cola vida de les persones cuando ya nun-y resultan rentables, como podemos comprobar anguañu n’Asturies.

La Corriente Sindical d’Izquierda quier reafirmar la so defensa de la continuidá de la estraición y usu carbón autóctonu mentantu siga habiendo n’Asturies centrales térmiques, al ser una materia prima cuyos yacimientos nel nuesu territoriu tienen reserva para delles décades y fonte d’empléu y de futuru pa comarques enteres, frente al carbón d’importación que, si bien puede paecer más baratu, acarreta un altu costu mediuambiental pol so tresporte en barcu dende llatitúes llonxanes y el so almacenamientu en puertos como’l d’El Musel, cuyes consecuencies en forma de desprendimientu de partícules contaminantes sufren na zona oeste de Xixón, y un altísimu costu humanu poles condiciones d’esplotación que sufren quienes arranquen el carbón en países como Colombia o Sudáfrica, amás de la persecución y asesinatu que sufren n’esos y otros países aquelles persones que se oponen a dicha esplotación.

Desiximos tamién, poles razones aludíes, la nacionalización total del carbón, que eviten desastres económicos y sociales como los que sufren los conceyos mineros de la zona occidental y que, cuando realmente seya inevitable, nun futuru, el pieslle de la minería del carbón, esti venga precedíu d’un plan enerxéticu bien implementáu y por midíes económiques y en materia d’empléu reales, que eviten desastres económicos y sociales como los que anguañu sufren les comarques mineres del centru y occidente d’Asturies.

Abogamos, asinamesmo, porque se implementen nel seutor les midíes teunolóxiques afayaíces pa una combustión llimpia del carbón, como por exemplu les destinaes a la captura del CO2.