CSI-EMA

Vémonos de nueu na obligación de denunciar énte la Inspeición de Trabayu lo que entendemos como graves incumplimientos en materia de seguridá y salú llaboral.

Nesta ocasión esponemos públicamente una situación que nos afeuta como trabayadores y que puede afeutar a a la ciudadanía pol posible deterioru de les instalaciones y la rede de saneamientu.

Denunciemos la práutica habitual que fae la empresa obligando, direuta o indireutamente, a les y los trabayadores a trabayar en solitariu y en situaciones d’aisllamientu, especialmente nes plantes depuradores d’esti conceyu.

Xixón cuenta con una redede saneamientu d’unos 1.000 km, que conduz les agües residuales a dos depuradores: “La Reguerona”, allugada na cuenca Oeste y “El Pisón”, allugada na cuenca Este. La Empresa Municipal d’Agües destina a estos servicios lo que nos paez una cantidá insuficiente de personal (alrodiu de 25 persones).

Na Planta de la Reguerona, cuéntase con personal de llaboratoriu, personal operariu y personal de mantenimientu (elléctricu y mecánicu) y a la Planta del Pisón destínase únicamente personal operariu.

Les plantilles de mantenimientu viéronse mermaes paulatinamente. Si nos entamos de l’actividá de depuración la empresa destinaba 5 ellectricistes y 5 mecánicos a cubrir les necesidaes de mantenimientu de les dos plantes, anguañu queden namás 2 ellectricistes y 3 mecánicos, que tienen que concentrar los turnos y guardies permanentes pa que’l serviciu nun quede desatendíu. Llegóse al puntu de tener que llamar personal del Serviciu d’Empléu pa cubrir contratos de menos d’un mes porque los operarios de la bolsa refuguen tan llacerioses ufiertes. Por nun mencionar el costu económicu que supón la falta de mantenimientu pa una instalación como esta.

El personal que se encarga del control y manexu de les plantes encuádrase nunes categoríes profesionales que daten de los años 60, y carez d’una rellación de puestos de trabayu con una mínima definición de funciones (obligatoria sigún Conveniu).

En dambes depuradores, la dotación de personal operariu mientres el fin de selmana ye d’una persona siempre nel Pisón y de dos en la Reguerona que entren y salen (soles) a revisar otres instalaciones . Na planta d’El Pisón trabaya una sola persona operaria nel turnu de tarde y de nueche, mientres que en La Reguerona nun esiste turnu de nueche (nun hai personal operariu presente n’ella). Imaxínense la situación en casu d’accidente llaboral u otro posible percance.

El llaboratoriu y la cantidá de personal que lu atienden diseñáronse pa unes necesidaes que nun se afayen a les actuales pol incrementu de los kilómetros de rede de saneamientu.

Tres dir, en delles ocasiones, a la Xerencia de la empresa, nun nos quedó más remediu que facer pública esta situación.

Al mesmu tiempu que denunciamos la llaceriosa situación del personal nes nueses depuradores, incidimos na necesidá de convocar places específiques pa ellectricistes, personal mecánicu y operariu y dotales de les garantíes que tién que tener un empléu dignu (pol que ca vegada menos representantes políticos paecen apostar).