CSI SAINT GOBAIN DESPEDÍA POR TAR ENFERMA

Saint Gobain amuesa la so cara más despiadada y procede a despedir a una compañera por motivos de salú. Nesti casu, una trabayadora que tres una llesión non incapacitante, producía amás nel puestu de trabayu, la empresa deniéga-y cualesquier posibilidá de reincorporación. Lo que supón na práutica un DESPÍU puru y duru.

La Empresa utiliza pa esti menester al so Serviciu Médicu como collaborador necesariu que actúa de verdugu escontra la trabayadora, declarándola como Non Apta pa cualesquier puestu de trabayu. Esto implicaría que cualesquiera de nosotres y nosotros pueda ser despedíu si’l Serviciu de Prevención de la empresa valora que nun yes apta o aptu pal trabayu que desempeñes por una llesión o enfermedá que tengas. Entendemos que esta forma de proceder pervierte les funciones de la vixilancia de la salú, infrinxe la Llei de Prevención de Riesgos llaborales y atenta claramente escontra’l drechu a la salú y la so proteición que tenemos toles persones.

Resulta intolerable que la Direición nun proceda a afayar el puestu de trabayu, aplicar midíes preventives u optar pol reallugamientu n’otros puestos, talu y como siempre fizo y sigue faciendo anguañu con otres y otros compañeros y casos.

Esta práutica dexa nel vertederu tolos principios, códigos éticos, declaraciones, publirreportaxes, slogans y demás campañes rimbombantes que Saint Gobain llanza pa meyorar la so imaxen d’empresa EXEMPLAR y MODÉLICA, respetuosa coles persones y trabayadores.

La realidá ye perestremada. La Direición lo que fae con crueldá ye desprotexer a les y los sos trabayadores más vulnerables, aprovechándose de la so salú y tratanos como un recambiu al que fuerza hasta frayalu y una vegada defectuosu lu tira. Enfermamos o nos llesionamos y la xenerosa empresa nos “sacrifica” despidiéndonos. Actitú inmoral e indecente.

Dende la Corriente, sofitamos los paros de 4 hores convocaos pa los díes 3 y 6 d’ochobre, anque paéznos insuficiente, yá que énte una agresión tan grave como ésta pensamos que hai que dar una rempuesta fuerte y sostenía hasta algamar la REALMISIÓN de la trabayadora.

¡¡¡ MAÑANA PUEDE TOCATE A TÍ !!!

¡¡¡ DESPEDÍA, REALMISIÓN !!!