Escontra la persecución al compañeru Toño y a la seición sindical de CSI en MECALUX-ESMENA

En payares de 2017, la CSI presentó candidatura por primer vegada nes elleiciones sindicales en Mecalux-Esmena, algando la mayoría absoluta nel Comité d’Empresa (7 miembros de les y los 13 que formen esti órganu de representación).

El fechu de que se organizare la seición sindical de la CSI en Mecalux-Esmena orixinó una dura ofensiva pela parte de CCOO al ver amenazada la so cuota de poder nos órganos de representación de les y los trabayadores, dada la trayeutoria de llucha y compromisu de les y los compañeros que formaron la seición de la CSI.

Dempués de toa una campaña ente les y los trabayadores pa intentar, en vanu, desprestixar a quien decidieron dar la pelea sindical dende la CSI, n’ochobre de 2017, xusto enantes de les elleiciones sindicales, el delegáu de CCOO na empresa presenta una querella criminal escontra’l compañeru Toño, cabeza de llista de la CSI y actual presidente del Comité d’Empresa, na que se utilicen artimañes (permanentes provocaciones que busquen xenerar reaiciones utilizables nuna demanda d’esta triba y grabaciones de conceyos de los órganos de representación coleutivos y conversaciones o discusiones ente trabayadores) ayenes dafechu a la llucha sindical incluso cuando se producen fuertes enfrentamientos dialéuticos ente sindicatos por mor de los estremaos modelos d’aición de cada ún d’ellos.

En base a esta querella criminal, el delegáu sindical de CCOO n’Esmena solicita una indemnización de 25.000 euros por, supuestamente, resultar inxuriáu y la imposición al compañeru Toño de multes por importe de 22.800 euros.

Nos últimos tiempos, vimos esta mesma estratexa de pretender fundir económicamente a compañeres y compañeros lluchadores mediante una querella criminal cuando nun ye posible obligá-yos a desistir na so pelea polos drechos de toles y tolos trabayadores nel casu del Hotel Reconquista, nel que una compañera de CCOO enfréntase a una querella d’esta triba plantegada pola empresa que xestiona l’hotel.

Resulta paradóxico que esta triba de maniobres escontra’l sindicalismu combativu les utilice CCOO pa intentar vengase pola so derrota en Mecalux-Esmena y pa intentar acallar la voz de quien algamó l’apoyu mayoritariu de les y los trabayadores en base a la so trayeutoria y al so compromisu colos drechos de la clase obrera.

Dende la CSI condergamos esta triba de maniobres más propies d’empresariáu ensin escrúpulos que de sindicatos que se dicen de clase y manifestamos la nuesa total solidaridá col compañeru Toño y cola seición sindical de la CSI en Mecalux-Esmena.