COMUNICÁU DE LA SEICIÓN SINDICAL DE LA C.S.I. EN VAUSTE SPAIN

Dende’l 20 d’Agostu al 18 de Setiembre vamos tar cumpliendo una sanción impuesta pola direición de Vauste Spain, consistente na suspensión d’empléu y sueldu mientres un mes. Mientres la duración d’esta sanción (recurría énte los tribunales), como protesta pola mesma y pola querella criminal interpuesta escontra nós por Fernando Sanz Negrillo (Direutor de Vauste Spain), con penes de 1 a 4 años de prisión, vamos tar acampaos delantre la factoría mientres los 30 díes que dura de la sanción Amás, en protesta, van facese cortes de carretera delantre la fábrica.

Revindicamos con esta aición el nuesu refugu dafechu a estos fechos, yá que en tou momentu cumplimos coles nueses obligaciones y drechos como representantes llegales de les y los trabayadores de Vauste Spain. El motivu esgrimíu pola direición de la empresa pa la sanción y la querella nun ye otru que una mentira más, simplemente llevamos información a l’asamblea de trabayadores de Vauste Spain.

Dende la venta de la planta de Tenneco al fondu utre (asina lu llamó el que yéra Ministru de Facienda n’aquel momentu, Montoro) Quantum Capital Partners, y la creación pela parte d’esti de Vauste Spain SLU pa llevar la planta de Xixón, les inversiones prometíes pa la planta siguen ensin apaecer, inversiones avalaes por un alcuerdu ente les partes y el Principáu d’Asturies. En Marzu del 2019 esti alcuerdu acaba, y con él, el compromisu con Tenneco, únicu cliente a día de güei de Vauste Spain, polo que tememos el pieslle, venta o lliquidación de la planta. D’otru lláu, la direición escúdase na inversión fecha nuna planta de magnesiu, que vién sufriendo reiteraos retrasos. Sigún la direición, el primer trimestre de 2018 taría a plenu rendimientu, dempués foi’l segundu trimestre d’esti añu, agora asoleya en prensa que n’Ochobre. Dende la CSI nun ponemos en dulda que esi proyeutu llegará a ponese en furrulamientu, pero con too y con ello nel meyor de los casos, en Marzu de 2019, daría trabayu a 22-24 trabayadores, y recordamos que la plantilla de Vauste ye de 130 trabayadores. D’otra parte la inversión fecha nesta planta queda mui lloñe de lo comprometío nel alcuerdu robláu por Tenneco, Quantum Capital Partners y Principáu d’Asturies, y dende esta seición namás vemos como solución a curtiu plazu que nos amplíe’l contrato PAPA TENNECO, si non temémonos que dalgo grave va pasar en Marzu de 2019.

Solicitamos una vegada más total tresparencia nes inversiones, el futuru y la viabilidá de Vauste, asina como’l cumplimientu de los alcuerdos roblaos por Tenneco, Quantum Capital Partners y el Principáu d’Asturies, pa asina poder caltener tolos puestos de trabayu de les nueses y nuesos compañeros.

Igualmente pidimos la retirada de les sanciones, lo mesmo’l mes d’empléu y sueldu que nos impunxeron, que los siete díes d’empléu y sueldu a otros cinco compañeros por ser solidarios, yá que estos fechos son, ensin más, un castigu por intentar cumplir colos nuesos deberes y obligaciones como representantes de les y los trabayadores.

Pedimos la vuesa solidaridá, característica d’esti sindicatu, pa futuros cortes de carretera que vamos facer delantre de Vauste. Avisarásevos con antelación.