Fuelga CSI Vauste

FUELGA CONVOCADA POR CSI EN VAUSTE

¿POR QUÉ TAMOS EN FUELGA?

1. ¿TÚ CREES QUE HAI FUTURU PA VAUSTE?

¿Cumplió la empresa colo apautao? ¿Fizo les inversiones prometíes? ¿Formó a la plantilla pal nueu negociu? ¿Tá desendolcada y en furrulamientu la producción de magnesiu dientro los plazos afitos? ¿Tán formalizaos los contratos con otres empreses pa la fabricación d’exes y amortiguadores? Dende la seición sindical de la C.S.I. creemos que toes estes entrugues respuéndense con un taxante NON. Ye difícil creer que tovía quede dientro la plantilla dalguien que polo menos nun tenga series duldes alrodiu’l nuesu porvenir. El silenciu y la inmovilidá nun son les meyores ferramientes pa igüar el problema.

2. TORNEROS Y RECTIFICADORES SANCIONAOS

Nun fechu ensin precedentes na fábrica, un xefe d’equipu, miembru amás del comité d’empresa, usa una pizarra pa escribir un mensaxe de reprobación, a mou d’escarniu públicu, hacia un trabayador, miembru tamién del comité d’empresa, de la C.S.I. Una llamada d’atención, sigún la so opinión, pol trabayu fechu por ésti últimu. Ésti ye un tratu que dengún trabayador o trabayadora merez, pues hai otros medios pa igüar éstos problemes. Nun ye más cristianu’l que-u reza a Dios. Énte ésta situación, cinco compañeros d’esta seición sindical, amuesen la so refuga a esti actu usando dos hores y media del turnu de nueche pa llimpiar y facer xeres de caltenimientu envede producir. En consecuencia, y d’una manera desmedía dafechu, la empresa sanciónalos con una selmana ensin empléu y sueldu. Un castigu que pretende ser exemplar y disuadir a los demás trabayadores de que tomen midíes asemeyaes nel futuru.

3. REPRESENTANTES DE LA C.S.I. SANCIONAOS

Un miembru’l comité d’empresa y el delegáu de la C.S.I. son sancionaos con un mes d’empléu y sueldu por recabar información y sacar semeyes que dexen a les clares que’l plan de futuru de la empresa tá en pañales. Argumenten que entraron pola fuerza na nave na que supuestamente van producise pieces de magnesiu, fechu falso dafechu. Esta información sal en prensa y vuelve a garralos col pasu cambiáu, apurando y sacando les famoses “newsletters” que a estas altures engañen a perpoques y pocos.

El restu de seiciones sindicales caltiénense al marxen del asuntu, C.C.O.O. argumenta que nun sofita la fuelga porque ésta nun la votaron n’urna toles y los trabayadores y U.G.T. tampoco la sofita porque nun tá aprebada pola asamblea. El comité nun quier convocar asamblees, prefier informar a les y los trabayadores mediante mensaxería y va poco nun fou posible convocar una con firmes de les y los trabayadores al nun llegar al mínimu. Asina difícilmente puede informase y menos votar.

Por too esto y como dicía la canción, sobrénnos los motivos.