Comunicáu de l’Asamblea de Trabayadores de Burger King

Estimaes compañeres, compañeros,

Les y los trabayadores de los tres centros de trabayu de BURGER KING (GIGIA NALÓN, PLAYA NALÓN Y GUSLA NALÓN) allugaos en FORO, BEGOÑA Y PLAYA de Xixón (Asturies) tenemos convocada xornada de FUELGA el DOMINGU 22 Y 29 DE XUNETU DE 2018 con concentraciones nos centros citaos.

Les y los trabayadores de Burguer King concesionaos a “Grupo Nalón” (GIGIA NALÓN, PLAYA NALÓN Y GUSLA NALÓN) van concentrase mientres tou’l día delantre los tres centros, siendo la mayor concentración a les 12:00 delantre’l llocal de PLAYA ( Frente a la escalera 14 de San Llorienzu). L’anterior fuelga convocada, que contó un siguimientu superior al 90%, calteniéndose zarraos los llocales de Begoña y Playa, y abriendo a intervalos teniendo que contratar al traviés d’ETTs pa intentar abrir los llocales, pero gracies a la solidaridá ciudadana algamóse que malpenes se consumiere esi día.

Les y los trabayadores de Burguer King concesionarios a Grupo Nalón (GIGIA NALÓN, PLAYA NALÓN Y GUSLA NALÓN) vamos siguir desixendo’l cumplimientu de los nuesos drechos, que fueron los motivos de convocatoria d’esta xornada de fuelga, énte l’incumplimientu pela parte de Grupo Nalón d’abondos artículos del conveniu d’hosteleria del Principáu d’Asturies, como la manutención, ropa de trabayu y EPIs, escesos de carga de trabayu que deriven de la falta de personal y de la precarización de les condiciones de trabayu, desixendo la meyora del caltenimientu de los llocales que se atopen en condiciones d’insalubridá y que afeuta a la salú de trabayadores, y de consumidores. D’otra parte, desiximos el respetu a les categoríes profesionales de les y los trabayadores, y denunciamos les vulneraciones al drechu d’información de les y los representantes de les y los trabayadores, a quienes se somete a coacción, amenaza regular, apertures d’espedientes sancionadores, represión y persecución.

De nun cumplise les nueses desixencies, el conxuntu trabayadores vamos siguir adoptando midíes pola defensa de los nuesos drechos, como dexen patentes les solicitudes y requerimientos constantes a la empresa, y viéndonos forzaes y forzaos a convocar esta xornada de Fuelga énte les reiteraes negatives a cumplir la llegalidá vixente y los alcuerdos coles y los representantes de les y los trabayadores.