Escontra la persecución a la CSI en VAUSTE (Antigua Tenneco)

Dende que Vauste Spain garró la planta de Tenneco en Xixón, vienen asocediendo una ristra de situaciones que, pola so continuidá, nun pueden tratase como fechos aisllaos, sinon como parte d’una estratexa definía y desendolcada pola direición de la empresa escontra la seición sindical de la Corriente.
Esta ofensiva patronal escontra la CSI cuenta, sorprendentemente (o non tanto), cola complicidá activa de dalgunas y dalgunos sindicalistes que paecen escaecer que la so misión ye defender los drechos de les y los trabayadores y velar pol futuru de la planta y de los empleos de tolos compañeros y compañeres, seya la que seya la so afiliación sindical.
Como sindicalistes de CCOO, UGT y/o USO resulta llexítimo discrepar de la llínia d’actuación sindical de la CSI (el sindicatu más votáu na empresa), pero lo que nun ye almisible ye ser cómplices de la direición nesta escalada represiva escontra compañeres y compañeros de trabayu cuyu únicu delitu ye la desixencia de garantíes reales de futuru pa la planta de Vauste en Xixón.
Muncho menos tolerable tovía ye afalar, por activa o por pasiva, actuaciones empresariales que namás busquen la demonización de quien, dende la CSI, nun se conformen col discursu de la direición y piden inversiones reales y planes de futuru avalaos con fechos y nun sólo con pallabrería güeco.
Al marxen de les interpretaciones interesaes, los fechos falen por sigo mesmos:
Después de les denuncies de la CSI n’Inspeición de Trabayu escontra delles actuaciones de la empresa, en mayu de 2017 un altu direutivu de Quantum Capital Iberia, propietaria de Vauste, califica de yihadistes a los miembros de la CSI y los compara col terrorista suicida de Manchester.
El restu los sindicatos que formen parte del comité d’empresa, lloñe de responder conxuntamente a esta insólita agresión, deciden boicotear l’aición sindical de la CSI, queriendo torgá-y el drechu a entamar movilizaciones pol futuru de la planta de Xixón.
De magar esta situación y de la denuncia de CSI alrodiu les graves acusaciones del executivu de Quantum Capital Iberia, tán asocediéndose actuaciones (unes públiques y otres amparaes nel anonimatu, pero toes enfocaes escontra los delegaos y afiliaos de CSI) que delaten una estratexa de crispación organizada que busca l’enfrentamientu personal ente trabayadores pa tapecer lo de verdá importante: la falta d’un plan de futuru pa Vauste en Xixón.
Estos son dalgunos de los fechos que formen parte d’esa campaña:
Acusación pública de la mayoría del comité d’empresa acusando falsamente al secretariu de la CSI d’una avería na maquinaria.
Estrozos por dos vegaes consecutives nel coche del secretariu de CSI (700 euros de costu de reparación)
Taquilla d’otru militante de CSI reventada, con robu de les llaves que taben dientro.
Tablón de la CSI pintáu con xirón negru.
Pinchazu de rueda del coche’l secretariu de CSI
Pegadielles de la CSI arrancaes
Comunicáu de la CSI tiráu en suelu de la oficina’l comité y con marques de ser pisoteáu
Taquilla’l secretariu de la CSI reventada, con robu de 50 euros y pegadielles del sindicatu
Mensaxes vexatorios escontra’l secretariu de CSI nel tablón de la seición de tornos que se caltienen cola complicidá de los xefes.
Énte esta socesión de fechos que evidencien la existencia d’una estratexa dirixía por quien quier lliquidar a la CSI en Vauste en Xixón, dende la Corriente manifestamos que nin les amenaces nin les cobardes agresiones anónimes van algamar que dexemos de cumplir cola nuesa obligación de defender los drechos de les y los trabayadores y el futuru de los nuesos empleos como ficimos nel pasáu y como vamos facer siempre.
Dende la CSI facemos un llamamientu a toles y tolos trabayadores a refugar estos actos intolerables que güei tiénnos a nosotres y nosotros como oxetivu, pero que mañana pueden afeutar a cualesquier trabayador o trabayadora que pola so actitú reivindicativa nun seya del preste de quien pretende amordazar a cualesquier voz crítica.
Poro, pesie a too, la CSI nun se rinde.
Siguimos na llucha, pése-y a quien-y pese.
Pol futuru de Vauste en Xixón
Escontra la persecución a quien llucha polos drechos de les y los trabayadores
Que viva la llucha de la clase Obrera!!