La CSI llama a la participación nes convocatories d´arrope y solidaridá cola Flota de la Llibertá

Énte la llegada estos díes del Al Awda (El retornu) y el Freedom (Llibertá), los dos barcos que formen parte de la edición d’esti añu de la Flota de la Llibertá, al puertu de Xixón, dende la Corriente Sindical d’Izquierda facemos un llamamientu a tola afiliación y al conxuntu de la clase obrera asturiana a participar nes actividaes que nos próximos díes van desendolcase na ciudá como acompañamientu a les y los 30 internacionalistes que viaxen nestes embarcaciones y cuyu oxetivu final ye frayar el bloquéu marítimu que l’Estáu sionista impón a la población palestina.

En concreto, les actividaes de calter públicu que van desendolcase y a les que facemos un llamamientu son: manifestación el xueves día 14 a les 19:30 hores, que partirá dende la Plaza’l Marqués pa acabar delantre la recién rehabilitada Escuela de Comerciu, onde dempués va haber un actu de receición. El vienres 15, tamién na Plaza’l Marqués, tendrá llugar de magar les 18:30 hores un actu de calter cultural y reivindicativu, onde habrá espaciu pa la música, la poesía, el teatru y les intervenciones de les y los internacionalistes y de persones refuxaes palestines.

Pa la CSI, como sindicatu de clase, asturianu e internacionalista, ye perimportante que estes convocatories seyan secundaes masivamente, pa unviar un potente mensaxe de solidaridá a la población palestina, que anguañu sigue siendo bombardeada, humillada y masacrada vilmente pol Estáu sionista, y un mensaxe tamién precisamente de refugu al xenocidiu que’l sionismu lleva más de 70 años desendolcando en Palestina.

Lo mesmo que yá asocedió n’otres movilizaciones recientes, como’l refugu al intentu de “normalización” del Estáu sionista al traviés de los sos embaxadores culturales nel Teatru Jovellanos, la masiva protesta escontra la cellebración d’un partíu de fútbol nel que participaba la selección d’Israel n’El Molinón, o les masives muestres de refugu a les operaciones punitives del exércitu israelí n’abondes concentraciones y manifestaciones, les cais de Xixón tienen que enllenase’l xueves y el vienres de dignidá, compromisu y solidaridá.

PUXA PALESTINA LLIBRE. PALESTINA VENCERÁ.