Comunicáu de la seición sindical CSI-Vauste Spain

Güei pela mañana 4 de Xunu del 2018, tenía que cellebrase’l xuiciu pola demanda que esta seición sindical interpunxo escontra los miembros del comité d’empresa de CCOO, UGT y USO por tutela de drechos fundamentales, tres vulnerar éstos de siguío la Llei Orgánica de Llibertá Sindical, coartando les aiciones que esta seición sindical pudiere tomar na empresa.

El xuiciu quedó suspendíu, dándonos el xuez cuatro díes a esta seición sindical, tres la petición de CCOO, pa que na demanda la CSI incluya a la totalidá de les y los trabayadores de Vauste Spain, dalgo que, nun principiu, nin considerábemos oportuno ni pensábemos facer.

Una vegada más, esti comité intenta esquivar les sos actuaciones, una vegada más intentando enfrentar a esta seición coles y los trabayadores de la planta, que usa como pantalla pa quedar impune.

La seición sindical de la CSI va siguir cola demanda, comunicando a toles y tolos trabayadores que, de la nuesa parte, nun vamos pidi-y a dengún trabayador o trabayadora que se presente nel xulgáu. Tampoco va pidir responsabilidá dalguna a dengún trabayador o trabayadora y, por supuestu, en dengún casu va pidir que dengún trabayador o trabayadora se faiga cargu del pagu de denguna indemnización.