A les condergaes de Altsasu, familiares y amistaes.

Xusticia

La Corriente Sindical d’Izquierda quier facer llegar tola so solidaridá y fuerza a les y los condergaos, desproporcionadamente, del casu Altsasu, asina como, a les sos families, persones, organizaciones que tuvieron, tán y, de xuru, van tar sofitando a les persones agora condergaes.

Otru desvaríu más del aparatu represor del Estáu Español. Esta conderga tá encuadrada nos cientos de casos d’ataques a los drechos fundamentales que vienen realizándose nos últimos tiempos. Acusaciones y sentencies infundaes e interesaes basaes na llexislación del sistema punitivu del Estáu Español, que nun respeta nin la llegalidá internacional, yá que fou alvertíu en delles ocasiones.

Castigos a priori individuales que quieren sometenos de manera coleutiva a toa aquella persona, voz o actu, que se resista a l’alienación de la fase neolliberal del procesu de socialización y explotación capitalistes. Castigu individual tamién pol llugar d’orixen de les persones imputaes y agora condergaes, yá que los mesmos supuestos delitos cometíos reciben castigos distintos si tienen llugar n’Euskal Herria o en cualesquier otru llugar baxo xurisdicción del Estáu español.

Pues nun van callanos, denunciaremos y participaremos más activamente, si cabe, en tou actu de difusión o denuncia que tea na nuesa mano, pa demostrá-yos que nun nos sometemos, que hai otra manera de vivir.

Ante la so represión, la nuesa solidaridá.

Llibertá pa la xente que llucha

Altsasu llibertá.