Manifestación 1 de mayu

1 de Mayu 2018, a les 12:30 h, con salida dende La Sindical, c/ Sanz Crespo, nº 3, Xixón, Asturies.

Convocan:
CGT, CNT, CSI, SUATEA

Esti añu entamamos dende La Sindical, yá que vamos facer un actu de protesta escontra l’intentu de derribar l’edificiu, al empar que reivindicar la hestoria del movimientu obreru asturianu, la nuesa hestoria.

Llega un nueu Primeru de Mayu y, lo mesmo que tolos anteriores, los sindicatos de clase asturianos vamos salir a la cai a reivindicar la dignidá de la clase trabayadora y a facer un llamáu a ésta a lluchar por esa dignidá na cai.

Si facemos balance del últimu añu vemos cómo, en xeneral, retrocedióse de manera alarmante nes condiciones llaborales y de vida de tola clase trabayadora, too ello con una escasa rempuesta social, aceptando les circunstancies nun amiestu de resignación y miéu que lleva a aguantar lo que seya enantes de vese nel paru. Pero la Hestoria amuésanos que la resignación namás lleva a dar carta blanca a la Patronal, clase política y “sindicatos” amariellos pa que sigan rubricando les nueses cartes de defunción.

Por suerte, esti añu tamién hebio quien nun se dexó pisar, que decidió plantar cara a retayos de sueldos, despíos, etc y que na grandísima mayoría de los casos algamaron los sos oxetivos, e incluso meyorar les sos condiciones, sobre too al traviés de la fuelga n’empreses y seutores concretos.

Tamién vemos cómo va xorreciendo la protesta na cai, con grandes movilizaciones como la Fuelga Xeneral feminista del 8 de marzu, que desbordó toles espeutatives, o les protestes escontra les pensiones de miseria. Empiecen yá incluso a sintise rumores llonxanos d’una posible Fuelga Xeneral.

Lo que nos amosaron estes lluches nesti últimu añu ye que la resignación nun val, que si dalgo quieres, has de lluchar por ello, yá que nun va caete del cielu. Poro, esti Primeru Mayu llamamos a tola clase trabauadora a que se rebele escontra la
precariedá, escontra la esplotación y escontra un sistema fechu a la midía del empresariáu y pal que la clase trabayadora nun merecemos siquier la condición de seres
humanos.

Por eso y por muncho más, la clase trabayadora tién que se organizar, d’una vez por toes, y salir a reclamar lo que ye de so, porque namás lluchando por ello va recuperar la so dignidá.

La llucha y la solidaridá son l’únicu camín.