La CSI denuncia nel parlamentu asturianu les implicaciones de la carrera profesional

21-12-2009 Les midíes impulsaes pol gobiernu y los sindicatos mayoritarios conducen a la perda d’independencia de l’alministración pública respeuto a los intereses de la clas política, cada vez más deseparaos de les necesidaes de la ciudadanía.

La CSI, xunto col restu de sindicatos que nun apoyen la "carrera profesional", pudo denunciar el conteníu de la Llei d’Ordenación de la Función Pública énte la Comisión d’Alministraciones Públiques de la Xunta Xeneral (a pesar de que PSOE ya IX solo demandaron la presencia d’UXT y CC.OO.), gracies a la invitación realizada pol PP.

[Lleer+: Estaya de la Alministración autonómica] [+info: Europa Press] [+info: RTPA]

Ñegase a pasar pel aru de la evaluación del profesoráu

21-12-2009 En coherencia col refugu de la "carrera profesional", la CSI denuncia que la Llei d’Evaluación de la Función Docente pretende tresformase a cencielles nun mecanismu de control y división del profesoráu.

Decenes de persones asistieron a la convocatoria de diversos sindicatos que s’oponen a esti proyeutu de llei. Desarticular les resistencies ye’l primer pasu pa recortar los drechos llaborales del profesoráu y desactivar la posibilidá de que la educación sirva como cortafueos de la lóxica del mercáu.

[Leer+: Estaya de la Alminstración autonómica] [+info: Europa Press] [+info: La Nueva España]

Muerte baxo custodia policial nel Estáu español

15-12-2009 Esti miercoles 16 d'avientu, a les 20h nel local Cambalache de Uviéu, va celebrase una charra sobre'l casu de David Blanco y l'informe policial. Amás fardrase un repasu de toes les muertes baxo custodia policial nel Estáu español a lo llargo de 2008, añu nel que morrió David na comisaria de la policia española en Xixón. La mesma charra podrá sentise'l próximu vienres 18 a les 20 h nos llocales de la CSI en Xixón.

El Sabadu 19 a les 19 h saldrá dende la plaza l'Humedal de Xixón la manifestación por David Blanco baxo'l llema "Queremos saber la verdad", agora que se cumple'l cabudañu de la so muerte.

[+info: Glayíu] [Ver+: cartel de la convocatoria]

Non al esmantelamientu de les Cuenques: llevamos más de 30 años de crisis

25-11-2009 La CSI de les Cuenques espresó la disconformidá colos plantegamientos que s’escuenden debaxo de la convocatoria realizada por CC OO, UGT y USO'l pasáu martes 24 de payares. Talo y como s’esplica nun comunicáu, esta manifestación llega tarde, consitúi una respuesta insuficiente, maquilla una realidá llarada d’EREs firmaos polos convocantes y esvía l’atención de la situación xeneral de les Cuenques, onde, amás del paru atopamos emigración, especulación urbanística, deterioru medioambiental... too ello frutu d’una política diseñada acullá del ámbitu de les empreses y que, polo tanto, tien que se contestar tamién acullá d’éstes.

Pa la CSI la solución escomienza cola construcción d’un texíu productivo que respuenda a les necesidaes sociales y a los problemes medioambientales, y tamién estableciendo una renta básica o defendiendo la soberanía alimentaria.

A pesar de les crítiques a los sindicatos CC OO y UGT, la CSI participó na manifestación —que salió a les 19:30 h de la tarde del Parque Dolores Duro (La Felguera)— pa esixir más movilizaciones escontra la patronal y el so gobiernu y en defensa de los intereses de los y les trabayadores de les Cuenques y d’Asturies.

La Seición Comarcal de la CSI nel Valle del Nalón espublizó tamién un comunicáu nel que denuncia’l negociu que supón la crisis pa munches de les empreses que se crearon colos fondos mineros; dísviase con ello de la imaxe de la crisis como daqué que mos afeuta a toos por igual, como les estaciones del añu. Per otru llau, defende la importancia d’un sindicalismu combativu y la necesidá d’una reactivación social cola recuperación de la conciencia de clas perdida tres años de traiciones, frustraciones y desengaños, “qu’en munchos casos tienen como culpables a les organizaciones qu’agora mos llamen a manifestamos".

[Lleer+: Comunicáu de la CSI de les Cuenques] [Lleer+: Comunicáu de la CSI del Nalón] [+info: La Voz de Asturias] [+info: La Nueva España]

Les irregularidaes nel SERIDA amplíense cola xestión d’IX

18-11-2009 La xestión del SERIDA (Serviciu Rexonal d’Investigación y Desarrollu Agroalimentariu) desepárase cada vez más de la que tendría que corresponder a un centru públicu d’investigación agraria, al serviciu del campu asturianu. La Estaya de l’Alministración de la CSI esplica nun comunicáu los cambeos qu’hebo de magar entró al gobiernu IX, y tamién el papel del Conseyeru de Mediu Rural y Pesca, Aurelio Martín.

La temporalidá nos contratos, les hores estraordinaries, l’ausencia de criterios d’idoneidá na seleición de personal, llinies d’investigación alloñaes de les necesidaes del campu y de la busca de la soberanía alimentaria... formen parte d’un llistáu llargu de problemátiques denunciaes pola CSI, que llama a oponese a unes polítiques que nin el PSOE nin el PP s’atrevieron a llevar alantre.

[+info: Comunicáu de la Estaya de l'Alminsitración autonómica]

Procedimientu d’espulsión por denunciar a la empresa na que trabayaben ensin contratu

18-11-2009 Dos trabayadores procedentes de Paraguái y residentes n’Asturies sufrieron nes últimes selmanes la impunidá d’un sistema d’esplotación y eslusión selectiva, amparáu pola Llei d’Extranxería, que d’equí a poco va reformase pa recortar entá más los drechos de les persones inmigrantes.

Estos dos mozos denunciaron por despidu improcedente y por impagu de varies mensualidaes a la empresa Escenasant S.L., propiedá de Bernabé Solana Arenal —empresariu con vínculos estrenchos col gobiernu de Cantabria—, na que tuvieron trabayando más d’un añu en condiciones d’esplotación miserable. La respuesta a esta actitú valiente de defensa de los drechos foi contundente: retención a les puertes del Xulgáu de lo Social de Santander, onde teníen la primer vista l’ún d’ochobre; burlles ya intimidación por parte de la xueza de guardia y del abogáu del empresariu; detención d’ocho hores en comisaría tres del xuiciu; nueva detención d’ún de los trabayadores durante 27 hores n’execución —en tiempu récor— del procedimientu d’espulsión abiertu en Santander, 48 hores primero del segundu xuiciu, nel que se personaba como acusación...

La Ruta escontra'l racismu y la represión (formada por dos decenes de coleutivos sociales, sindicales y políticos asturianos) denunció públicamente estos fechos y acompañó a los dos trabayadores en sendes concentraciones en Santander (en collaboración con diversos coleutivos de Cantabria) y Uviéu (onde se celebró una vista na que, a la final, suspendióse cautelarmente la orde d’espulsión d’ún de los mozos). Tamién espresó la solidaridá colos collacios llatinoamericanos y con tola población inmigrante que sufre les redaes, les espulsiones, los centros d’internamientu y la esplotación llaboral, comprometiéndose a denunciar cualquier otra vulneración de los drechos fundamentales.

Pa la CSI ye fundamental arropar a la xente que s’atreve a romper la llei del silenciu dictada pa la población inmigrante; y tamién al restu de persones que trabayen en condiciones de precariedá. Aiciones como les entamaes por estos mozos contradicen la imaxe d’un coleutivu pasivu y dócil que ta dispuestu a aceptar lo que sía. Lloñe de constituyir una punta de llanza escontra los drechos de los trabayadores, el coleutivu inmigrante pue tresformase nun suxetu que ye quien a impugnar un orde social del que se ven les peores consecuencies nos sos llombos.

[+info: Comunicáu de la Ruta contra'l Racismu y la represión] [+info: Respuesta al comunicáu del TSJC] [+info: Público] [+info: Suspensión cautelar del procesu d'espulsión]

De la carrera profesional a la solidaridá con Hondures

18-11-2009 La Estaya de l’Alministración Pública de la CSI acaba d’espublizar el boletín informativu del mes de payares. Dalgunos de los temes trataos son: l’alcuerdu sobre la carrera profesional firmáu por UGT y CC OO; el funcionamientu del Institutu Adolfo Posada y el negociu de la formación; la nueva anulación del concursu de negociaos y la probable paralización del concursu de seiciones; los problemes na Conseyería d’Educación; y tamién les denuncies realizaes pola CSI na Conseyería de Bienestar Social. El boletín inclúi, amás, un artículu sobre la situación n’Hondures y la posibilidá de contribuyir económicamente col movimientu de resistencia.

[lleer+: Fueya informativa]

Movimientu obreru y llucha antifacista

11-11-2009 En payares van celebrase delles actividaes de formación, alderique y protesta sobre’l 20-N entamaes pola Coordinadora Antifacista d’Asturies (CAA), nes que la participación del movimientu obreru na llucha antifacista y la solidaridá coles persones migrantes van ser temes a tratar:

Sábadu 14: : xornada Senegal-Asturies: 15 h espicha antiracista; 16.30 h. xuegos tradicionales d'equi y d'elli y Gimkana; 18 h, Charra-Alderique: Rellatos d'inmigracion (contaos polos protagonistes). Llocal Cambalache. Uviéu.

Llunes 16: Charra con Ruben Vega "Desenrollu y crisis del movimientu obreru asturianu nel tardofranquismu y na transicion", na Casa Sindical, 20 h. (Xixón)

Miércoles 18: Charra con Rafael Rodríguez Valdés "Ut uulgi utar sermone more patrie. Llingues y clases sociales n'Asturies", na Casa Sindical, 20 h. Xixón.

Vienres 20: Manifestación antifacista dende l'astilleru de Naval Xixón a les 19 h. A les 20 h conciertu Asturies Antifa Attack con Dixebra, A Quemarropa, Gomeru, Doris, SC Ganja Sound con Nebula Selektah. Xixón.

[+info: web de la CAA]

Represión sindical y sofitu de los trabayadores

10-11-2009 El llunes pasáu celebróse nos xulgaos de Mieres el xuiciu pol despidu d’un trabayador y miembru del comité d’empresa de Felguera Construcciones Mecánicas, Pablo López, que cuntó col sofitu de los compañeros que taben llamaos a la fuelga; hai enfotu en que’l xulgáu dicte una resolución favorable y se lu realmita.

[+info: La Voz de Duro]

L’alcuerdu sobre la carrera profesional afonda los sos efeutos más perversos

06-11-2009 El 3 de payares pasáu firmóse l’alcuerdu que vien a dar cobertera llegal a la enorme arbitrariedá na que se convirtió l’intentu d’implantar na nuesa Alministración la llamada carrera profesional (en realida trátase d’una mala carrera horizontal). Como yá se barruntaba desque entamó esti llastimosu paripé de negociación na Mesa Xeneral, tamos énte un calcu de lo que yá había (eso sí, empeorao), xunto col compromisu de que tolo demás va negociase nel Proyeutu de Llei de Función Pública.

La Estaya de l’Alministración Pública de la CSI analiza les consecuencies d’esti alcuerdu nel so últimu comunicáu y alvierte de que la carrera profesional conduz a la discriminación ente emplegaos públicos, a l’arbitrariedá (gracies al sistema d’evaluación nuevu), y a la penalización salarial; y tamién a una perda de capacidá de decisión por parte de la ciudadanía. (lleer+)

ALMINISTRACIÓN: Carrera profesional, xubilación parcial funcionarios y negociaos

Cambéu de llocal ya información sobre la carrera profesional

02-11-2009 Nesti últimu mes, la CSI tevo ensin posibilidá dala de mandar correos electrónicos informativos a los emplegaos públicos, por causa del treslláu a un llocal nuevu; los entramaos burocráticos fexéronmos tar tou esti tiempu aisllaos, hasta que llogremos solucionar el tema.

El nuesu nuevu llocal ta na cai Hermanos Pidal, nu 14, baxu, y les estensiones internes nun furrulen tovía, pero podéis dirixivos a nós telefónicamente nel 985 29 69 64, nes señes habituales de corréu electrónicu, o tamién vos vamos atender nel llocal sindical tolos vienres de 9 a 14 hores.

Axuntamos un escritu nel que recoyemos la nuesa opinión sobre los últimos acontecimientos rellacionaos cola tan trayida y llevada "carrera profesional", asina como una información sobre la situación actual de la xubilación parcial; y facémosvos saber que ta previsto que nel BOPA del llunes 9 de payares salga espublizada la resolución del concursu de negociaos; a partir del día siguiente, escomiencen los plazos pa tomar posesión de los destinos nuevos... [Lleer+]