Comunicáu CSI Feminismu ente la Fuelga Xeneral Feminista 24h.

Por primer vegada nos sos 36 años d’hestoria, y respondiendo al pidimientu del movimientu feminista, la Corriente Sindical d’Izquierda convoca fuelga xeneral de 24 hores n’Asturies, dando asina sofitu llegal al exe llaboral de la fuelga del 8 de marzu.

Les muyeres afiliaes a esti sindicatu, que tamién militamos nel movimientu feminista, consideramos un fitu hestóricu esta convocatoria de fuelga y tou’l procesu de trabayu y alderique que tá suponiendo.

Como sindicatu asturianu, de clase y feminista, la CSI asume la so responsabilidá coles muyeres que lluchamos tolos díes escontra’l sistema capitalista y patriarcal en tolos espacios de les nueses vides. Por too ello esta fuelga nun queda namás no llaboral: tamién vamos parar los cuidaos, los estudios y el consumu.

Asina, vamos facer fuelga de cuidaos: el 8M les muyeres vamos parar de cuidar, pero reivindicando los cuidaos, la so importancia nes nueses vides y la necesidá de que éstos seyan compartíos. Queremos rellaciones basaes nel respetu y la corresponsabilidá. Nun queremos cuidar nosotres soles.

Tamién vamos facer fuelga de consumu: vamos parar el comerciu de los nuesos barrios, pueblos y ciudaes. Y vamos aprovechar pa plantegar la necesidá d’un consumu responsable, llocal, de cercanía, cuidadosu col mediu nel que vivimos, cola nuesa salú y colos nuesos drechos llaborales.

Esta fuelga ue estudiantil: va parase nos colexos, institutos y universidaes; porque l’enseñu en toles sos etapes ye l’espaciu cimeru de socialización nel que se reproduz l’actual sistema capitalista y patriarcal, y tá perlloñe de ser un espaciu nel que se crez n’equidá e igualdá social.

El 8M vamos a la fuelga llaboral: pa desixir una llexislación llaboral que garantice la igualdá de drechos y oportunidaes ente trabayadores. Sóbrennos les razones: queremos acabar cola brecha salarial ente homes y muyeres; col acosu sexual y l’acosu por razón de sexu; cola precariedá de los seutores más feminizaos; cola falta de polítiques sociales que garanticen la conciliación familiar y llaboral; tamién pidimos la equiparación del permisu de paternidá y maternidá.

Toes estes razones, y munches otres que nun caben nos breves minutos d’una rueda de prensa o nel curtiu espaciu d’un panfletu informativu, llévennos a tar na cai, nun solo’l día 8, sinon cada día del añu, pero especialmente’l 8.

Esta fuelga fae un llamáu a toles muyeres a parar en tolos ámbitos de la sociedá. Pero como la vida nun puede parar yá que lrs persones mayores, persones dependientes, neñes y neños nun pueden dexasr de lláu, fáese tamién un llamáu a los homes pa que esi día paren nel trabayu pa encargase de los cuidaos del so entornu o que vaigan a los espacios que van abrise esi día pa esti fin.

Asina que afalamos a toles muyeres a xunise a los piquetes y aiciones que van facese’l 8 de marzu y a la manifestación que saldrá de la Plaza l’Humedal, a les 19h baxo’l llema “Si paramos nosotres, para’l mundu”.