[COMUNICAO] Situación Radio Taxi Villa de Jovellanos

Dende la CSI, tres el comunicáu de la xunta direiutiva de la cooperativa Radio Taxi Villa de Jovellanos, queremos amosar tol nuesu sofitu y solidaridá a toles trabayadores que tán trabayando na centralita.

En dichu comunicáu, la Xunta Direutiva acusa a les trabayadores de “tar ocioses mientres munches hores al día” y que “son un costu que nun ye operativu nin razonable”, dicen tener “intentao negociar una reduición de xornada”, asinamesmo acúsenles de “acoyese al so drechu de reduición de xornada pa protexese énte un despíu”, y poro cúlpenles de que posiblemente tengan que contratar a dalguien pa cubrir les baxes.
Dicen sufrir “amenaces continues de llevar a la empresa énte Inspección de Trabayu” y quéxense porque piden “que se-yos avise en tiempu y forma los cambios de turnu o tener que dir nun día señaláu como descansu”, avisen que toos estos fechos están en manes d’especialistes de drechu llaboral, y pa finar piden a los socios que nun acudan a la centralita pa nun interrumpir el trabayu que allí se fae.

Dempués d’esti comunicáu, nun podemos más que desmentir los fechos rellataos n’él, la totalidá de les trabayadores son profesionales cualificaes que faen dellos trabayos na centralita, dalgunos incluso per riba la so categoría. Si como diz la Xunta Direutiva tán ocioses, prestaríanos saber por qué denguna d’elles tién los descansos estipulaos por llei, e incluso tienen problemas pa dir al bañu.

D’otru lláu, 5 d’elles tienen reduición de xornada por fíes y/o fíos menores de 12 años, reduición a la que cualesquier trabayadora o trabayador tién drechu por llei, si bien ye cierto la concesión d’estes reduiciones foi voluntaria pola Xunta Direutiva, ya que nun tá obligada por conveniu, polo que nun entendemos que agora se quexen de dalgo que concedió ella.

La Inspeición de Trabayu ye la ferramienta que queda a les trabayadores pa pidir que se cumplan los sos drechos y cónstanos que lleven aguantando munchu tiempu una situación llaboral mui desagradable, ensin amenazar con nada.

Lo que tá claro ye que nun se puede consentir ye que te quiten un descansu o te cambien de turnu con dos hores d’,antelación, la organización correspuende a la empresa, pero siempre respetando la llei. Esperemos que los especialistes en drechu llaboral aconseyen bien y-yos digan que cesen estes actitúes impropies del añu 2018.

La CSI sofita y va sofitar a estes trabayadores nel so enfotu de que’l conveniu que la !unta Direutiva firmó va un añu se cumpla. Igualmente pidimos que cesen les presiones hacia les trabayadores pela parte de la Xunta Direutiva.