Comunicáu Sindical énte lo que tá asocediendo na Arxentina

El sindicalismu de clase de les estremaes naciones del Estáu, quier tresmitir a la opinión pública la so opinión sobre lo que mientres los últimos díes tá asocediendo na Arxentina estos últimos meses, y que nos esmolez fondamente.

La clase trabayadora Arxentina tá sufriendo un ataque terrible a los drechos llaborales y sociales conquistaos a base de llucha mientres años. Esmoleznos fondamente que anque la drecha esta vegada si llegare al poder dempués de ganar unes elleiciones, les sos polítiques económiques y sociales y la represión policial y militar desendolcada pa protexer eses polítiques disten muncho de ser democrátiques.

Nun tamos énte una drecha que como nel pasáu llegó al poder dempués d’un golpe militar. Tamos énte una drecha, la de Macri, que representa a los intereses de les grandes corporaciones y de la oligarquía financiera. Trátase d’un gobiernu al serviciu de los intereses del gran capital que nun pestañea a la hora de mandar los drechos sociales y llaborales de les clases populares a la papelera de la hestoria.

Los exemplos de tolo que tamos falando son munchos. Tá d’un lláu la represión escontra’l pueblu Mapuche na Patagonia y en xeneral la represión escontra’l drechu a la existencia de los pueblos orixinarios; una represión que nos últimos meses saldóse cola muerte de Santiago Maldonado y Rafael Nahuel. D’otru lláu tán toles reformes económiques y sociales que tá poniendo en marcha el Gobiernu de Macri que se carga d’un plumazu les conquistes llaborales y sociales y de la clase trabayadora y les clases populares.

Nun son nueves les recetes del Gobiernu de Macri; de fechu, trátase de les vieyes recetes neolliberales que yá conocimos nos Estaos Xuníos e Inglaterra nos años 80, na Arxentina a finales de los 90, n’Europa tres la crisis económica del 2008 y agora de nueu na Arxentina. Trátase de lo que siempre trató’l neolliberalismu; precarización de les condiciones llaborales, minimización hasta l’extremu del gastu publicu, privatización de los seutores públicos y amenorgamientu del gastu publicu.

Énte tou esti ataque neolliberal, queremos remarcar la rempuesta dada pol pueblu Arxentín nes cais. Un pueblu y una clase trabayadora organizada social y sindicalmente n’estremaos ámbetos pero que son perconscientes de lo que tá xugándose anguañu’l pueblu Arxentín. Paros, manifestaciones, xornaes de llucha… toes elles saldaes con un brutal represión, tán siendo habituales nos últimos meses, situación que dexa bien nidia la gravedá de lo que tá asocediendo anguañu na Arxentina.

Por too ello los sindicatos firmantes solidarizámonos col pueblu Arxentín y cola clase trabayadora de l’Arxentina. Los sindicatos combativos de les naciones tamos del vuesu lláu y vamos tar pa cualesquier cosa que seya necesario. Desgraciadamente les polítiques que tán aplicándose na Arxentina ya se aplicaron equí, polo que sabemos perbien polo que táis pasando. Comprometémonos a ufrir solidaridá ehí onde seya necesario y de llevar la vuesa voz a tolos requexos que podamos llegar.

Frdo: STEILAS, CUT Galiza, Intersindical Valenciana, Intersindical Alternativa de
Catalunya (IAC), FSOC Canarias, CUT Aragon, LAB Euskal Herria, ESK Euskal Herria,
Sindicat COS Països Catalans, Intersindical CSC de Catalunya, SAT Andalucia,
Confederación Intersindical Galega (CIG), CSI Asturies e Intersindical Canaria.