CARTA ABIERTA A L’ALCALDESA DE XIXÓN, BASTA D’HIPOCRESÍA

SOLIDARIDÁ COLES TRES PERSONES MULTAES POR UNA PANCARTA CONTRA’L MACHISMU

Desde Muyeres en llucha CSI queremos amosar la so solidaridá coles tres persones encausaes por visibilizar y denunciar la violencia machista, y desixir que se-yos retiren les multes impuestes. Poro dirixímonos a usté como persona competente na Conceyalía d’Igualdá (Muyer), como presidenta de la Xunta de Gobiernu del Ayuntamientu y como alcaldesa que representa al Ayuntamientu que diz tar comprometíu cola llucha escontra la violencia machista.

Los fechos a los que nos referimos tuvieron llugar el 1 de xineru del 2015, fae tres años, cuando estes tres persones al pasar de nueche pela valla que zarraba’l solar de l’antigua estación de tren, recoloquen una pancarta que taba medio arrancada, na que ponía “Por un 2015 llibre de machismu y represión”, al paecé-yos un bon propósitu pa entamar l’añu. Al marchar son paraes pola policía llocal que-yos pide la documentación, dos d’eses persones nun la llevaben, y de nada sirve desplicá-yos de qué yéra la pancarta, llévenles a comisaría hasta que yá de mañana a los policías-yos apetez garrá-yos los datos e informá-yos de les multes de 200 euros que-yos ponen a cada una de les tres (la otra persona esperaba fuera de la comisaría). Les multes fueron recurríes pero tres años dempués, tres ser embargaes les sos cuentes, van cellebrase los correspondientes xuicios nos que les persones afectaen piden la nulidá de les multes y la devolución de les cantidaes embargaes y cobraes por esi ayuntamientu. Los juicios tendrán llugar dos d’ellos pal día 23 de xineru a les 10:30 h, y l’otru pal 14 de febreru a les 11:30 h, nos xulgaos de Xixón.

Paéznos una vergoña nun sólo l’actuación policial, que ye más preocupante cuando esta fuerza ye la que diz tar formada y sensibilizada pa atender a les víctimes d’esta llacra social, sinon amás la hipocresía del ayuntamientu, que llegó a participar na plataforma vecinal que meses dempués escolingó nesi mesmu sitiu otra pancarta col llema “Gijón se mueve para no perder el tren” (axuntamos semeyes de la pancarta escolingada y de la convocatoria de la manifestación onde apaecen casi tolos grupos políticos del ayuntamientu ente otros coleutivos). Tamién nesi mesmu llugar escolingáronse nes elleiciones municipales pancartes de partíos políticos. Denguna foi multada. Lo mesmo qu’esti añu qu’acaba de pasar, 2017, fueron puestos cartelos fixos pol ayuntamientu nes entraes de la ciudá visibilizando’l refugu de la violencia machista.
Por too ello dirixímonos a usté, pa recordá-y:

1.- Qu’ún de los puntos del “Pautu social escontra la violencia sobre les muyeres” de Xixón, y que la pancarta escolingada cumplía diz:

“LLÍNIA ESTRATÉXICA 2: PREVENCIÓN Y SENSIBILIZACIÓN
Oxetivos
1.- Sensibilizar a la población en xeneral sobre’l problema de la violencia de xéneru”

2.- Que tamién nel documentu del Pautu social escontra la violencia de xéneru n’Asturies, al que esti ayuntamientu tá soscritu, podemos lleer na páxina 3, párrafu terceru: “Tamién la sociedá nel so conxuntu ha manifestar el so refugu evidente, de manera coleutiva pero tamién individualmente, porque ye responsabilidá propia exercer los mecanismos existentes p’aisllar a los maltratadores y sofitar a les muyeres y a los sos fíos. Poro esti pautu apela tamién al sintir y al compromisu individual de ca ún de nosotros y nosotres.
Enlace: ”https://www.gijon.es/multimedia_objects/download…

3.- Que nesi mesmu sitiu escolingáronse más pancartes poles que nun se multó.

4.- Que’l parque qu’anguañu tá nesa ubicación foi nomáu El tren de la libertad pol trabayu que ente otros coleutivos feministes ficimos munchos d’Asturies escontra la reforma de la llei del abortu del PP. Ello ye, d’un lláu dízse valorar la llucha feminista, pero d’otru criminalízase. Desplíquenos la razón.

6.- Que les persones multaes son persones comprometíes cola llucha escontra la violencia machista y lleven años de manifestaciones, charres, concentraciones (saliendo incluso, en delles partes d’Asturies, siempre que hai un asesinatu machista, reivindicando a toles víctimes), acompañamientu a les víctimes (comisaria, xulgaos,…), etc…tolo necesario pa acabar col machismu y toles sos violencies.

Por too reiteramos la nuesa desixencia de anula-yos y retirá-yos les multes inxustamente impuestes.

BASTA D’HIPOCRESÍA
BASTA DE PERSEGUIR Y MULTAR LES LLUCHES
TÓQUENNOS A UNA, TÓQUENNOS A TOES