La CSI sofita la manifestación de Paradxs y Precarixs d’Asturies

Manifestación: Xueves 30 de Payares, a les 19:00 h, PLZ. l'Humedal, Xixón, Asturies.

La CSI sofita la manifestación convocada por Paraxs y Precarixs d’Asturies, amás de facer un llamáu a la movilización continuada.

La manifestación, más que necesaria, nun ye un fin en sigo mesmu, sinon un mediu de denuncia pública de la falta de recuperación real pa la clase trabayadora. La llucha escontra la desigualdá social tién que siguir día ente día dende los sindicatos y coleutivos de clase, nos centros de trabayu, nes cais.

Los resultaos económicos del Gran Capital, la banca, grandes empresarios, grandes comerciantes, son gracies al emprobecimientu de la mayoría la población. El Dumping Social, causáu poles polítiques de la fase neolliberal del procesu de socialización y esplotación capitalista, impuestes polos estremaos Gobiernos corruptos y al serviciu del poder económicu, quieren conderganos al precariáu.

Pa ser quien a equilibrar la balanza de la xusticia social, tenemos que garrar concencia coleutiva y enfrentanos a quien mos esplota y reprime.

El orden socio-económicu n’Asturies y les sos consecuencies, precariedá, desempléu, probeza y emigración obligada por razones económiques, ye una urxencia. Ha ser responsabilidá de toes y toos forzar una reorganización del repartu de la riqueza, na que primen les oportunidaes a les persones pa desendolcar una vida con dignidá, enantes que l’acumulación descontrolada de capital por unes poques.

Escontra la esplotación intensiva de los recursos naturales y humanos

Por un repartu equitativu del empléu y la riqueza

Pa una vida digna y sostenible

Solidaridá coleutiva de clase