Comunicáu Sindical énte lo que tá asocediendo en Catalunya

El sindicalismu de clase de les estremaes naciones del Estáu español, quier tresmitir a la opinión pública la so opinión sobre lo que mientres los últimos díes tá asocediendo en Catalunya.

Entamamos reconociendo la llexitimidá democrática de les decisiones y alcuerdos tomaos poles instituciones catalanes, amparaes en Parllamentu de Catalunya, espaciu de representación política soberana del so pueblu, elexíu democráticamente.

Manifestamos la nuesa más enérxica repulsa énte l’aplicación, pela parte l’Estáu Español, del artículu 155 de la Constitución Española, destituyendo a un gobiernu llexítimu y democráticamente elexíu y anulando de facto l’autogobiernu de Catalunya y polo tanto les sos instituciones, que vién a ser un auténticu golpe d’Estáu a la democracia.

Denunciamos la persecución xudicial y la represión escontra la ciudadanía de Catalunya que se concretó coles detenciones de los presidentes de l’ANC y OMNIUN Cultural, la detención del vicepresidente y ocho consellers y cola citación xudicial del President Carles Puigdemont, del restu’l gobiernu y de la Mesa de Parllament de Catalunya e incluso cola detención de persones que denunciaron nes redes sociales l’actuación policial del pasáu 1 d’ochobre. Una escalada que paez nun tener llímites y que puede llevanos a un procesu d’importantes consecuencies polítiques, onde nun se cuestiona namás el drechu d’autodeterminación de los pueblos, sinon que tán vulnerándose drechos civiles fundamentales, como la llibertá d’espresión y manifestación. Y too esto afalao, paradóxicamente, pol gobiernu más corruptu d’Europa y el sofitu cómplice, bien por aición, bien por omisión, d’otres fuerces polítiques rehenes del réximen del 78 y de la so anacrónica monarquía.

Queremos amosar el nuesu sofitu al pueblu de Catalunya, que se enfrenta a un Estáu fondamente antidemocráticu que se negó, mientres más de 10 años, a dialogar y a buscar una salida pautada al conflictu. Nun hebio interés dengún en facelo, por esi motivu recurrióse al Tribunal Constitucional l’Estatutu aprebáu pol Parlament Català, les Cortes Españoles y aprebáu en referéndum poles y los catalanes y por esi motivu negóse a la convocatoria d’un referéndum pautáu ente toles partes pa que la ciudadanía catalana pueda espresase sobre’l so futuru.

El pasáu 1 d’ochobre votaron 2.286.217 de persones (una participación del 43% del censu). El sí algamó 2.044.038 votos (90,2% del votu válidu), por 177.547 del non (7,8%) y 44.913 en blanco (2%). Tamién hubo 19.719 votos nulos. Una cantidá de votos que pudo ser mayor si de 2300 colexos nun hubieren requisao urnes de 400 colexos elleutorales y nun hubieren usao violencia extrema causando 1066 feríes y feríos.

Énte toos estos fechos el gobiernu español tranca toles puertes al diálogu y al consensu, a buscar una salía pautada y democrática, a les reivindicaciones de les instituciones y del pueblu catalán poniendo en marcha midíes represives y coercitives y utilizando’l poder xudicial pal so propiu interés partidista.

Finalmente, los sindicatos abaxo firmantes comprometémonos a siguir sofitando les decisiones que llibre, democrática y pacíficamente vaiga tomando’l pueblu de Catalunya, porque entendemos que la solidaridá ye la ternura ente los pueblos y porque, como sindicatos de clase, entendemos que nun ye posible un cambiu social tresformador ensin superar el réximen del 78. Por too eso, siguiremos sofitando dende los nuesos ámbitos y con toles nueses fuerces al pueblu de Catalunya.

Pa finalizar desiximos al Estáu Español que reconoza la voluntá mayoritaria del pueblu de Catalunya y los drechos que como tal-y correspuenden y desiximos la llibertá de toles persones deteníes, los presidentes d’ANC y OMNIUM, y del vicepresidente y les y los ochos conseyeros del gobiernu catalán.

Roblen; CUT Galiza, CUT Aragon, CSI Asturies, ELA Euskal Herria, COS Països Catalans, Intersindical CSC, LAB Euskal Herria, Confederación Intersindical, Intersindical Valenciana, SAT Andalucia, IAC Catalunya, Confederación Intersindical Galega, STEI Balears, STEILAS, FSOC Canarias, ESK Euskal Herria.