Comunicáu de sofitu a les y los trabayadores de Comunicalia

Dende la Corriente Sindical d’Izquierda queremos amosar el nuesu incondicional sofitu a les y los trabayadores del Grupo Comunicalia dedicaes y dedicaos a la comercialización e instalación de productos de la multinacional de telecomunicaciones Orange y Jazztel.

Les y los empleaos de les siguientes empreses del Grupo Comunicalia, tuvieron güei un conceyu colos servicios xurídicos del grupu, nel que-yos comunicaron lo que vién darréu:

Les empreses Comunicalia y Telko van presentar un espediente d’estinción pa tola so plantilla.

La empresa Inlogi va proceder a realizar el despíu oxetivu de la plantilla.

Amás les y los trabayadores siguen teniendo les mensualidaes de Setiembre y Ochobre ensin percibir.

Énte estes nueves comunicaciones de la direición de la empresa a estes y estos trabayadores, asesoraremos y trabayaremos cola nuesa afiliación pa vixilar el correutu procesu que se-yos presenta, teniendo en cuenta que’l Grupo Comunicalia lu formen 14 empreses, dalguna d’elles fuera del Estáu español y que amás esti grupu ye o foi patrocinador del Comunicalia Sailing Team, equipu de vela formáu poles regatistes Ángela Pumariega y Patricia Cantero, del Oviedo Booling club que cuenta con 13 equipos y que na temporada 2015/2016 Grupo Comunicalia llegó a un alcuerdu de patrociniu col Club de Balonmano Gijón Jovellanos, l’equipu de balonmanu de la ciudá.

Dende la CSI defenderemos los drechos d’estes y estos trabajadores pol mantenimiento d’un puestu de trabayu dignu.