Severu correutivu al sindicalismu amariellu de CSIF

Monumental batacazu al sindicalismu amariellu y burocráticu de CSIF nel so reiteráu intentu de torgar que la Corriente Sindical d'Izquierda siga llamándose CSI.

L’Audiencia Provincial d’Asturies dictamina que, como yá sentenciare en payares de 2016 el Xulgáu de lo Mercantil nº3 de Xixón, CSIF obró de mala fe y fizo un exerciciu abusivu del drechu al pretender que la Corriente Sindical d’Izquierda dexare d’utilizar les sigles CSI.

L’Audiencia Provincial, lo mesmo que lo ficiere nel so momentu’l Xulgáu de lo Mercantil, impón a CSIF el pagu de les costes procesales.

Na so demanda, CSIF alegaba que son los únicos propietarios de la “marca comercial CSI” y, ente otros disparates, pretendía que se torgare utilizar diches sigles a la Corriente Sindical d’Izquierda, desixía que-y pagáremos una cantidá a determinar por daños y perxuicios, que destruyéremos tola propaganda ellaborada como CSI, y que se asoleyare la sentencia en dos revistes y espublizaciones de difusión nacional a elexir por ellos, con cargu a la Corriente.

Como quedó acreditao nes sentencies, la CSI existía dende 1982 como Asociación Sindical Corriente d’Izquierda, pasando a denominase Corriente Sindical d’Izquierda (CSI) en 1984.

Pela so parte, los funcionarios franquistes, una vuelta desapaecíu’l sindicatu vertical nel que tuvieren mui a gustu, fundaron en 1978 un sindicatu llamáu CSIF que pasó a denominase CSI-F nel añu 2000, rexistrando esta denominación como marca comercial en 2009.

Los argumentos emplegaos polos direutivos estatales de CSIF na so demanda amuesen que estos burócrates sindicales ficieron del sindicalismu amariellu que prautiquen una suculenta forma de negociu que-yos permite, amás de permanecer lloñe de los sos puestos de trabayu, dedicar importantes recursos económicos a esta triba d’estratexes de guerra puerco escontra un sindicatu como la Corriente Sindical d’Izquierda que, al paecer, resulta un estorbu pol modelu de sindicalismu comprometíu y combativu que prautica.

Dende la CSI consideramos intolerable dafechu que, na situación actual, cuando les y los trabayadores tamos sufriendo la mayor ofensiva escontra los nuesos drechos nes últimes décades, haiga seudosindicatos que, envede dedicase a pelear escontra los atropellos que tá sufriendo la clase obrera, pierdan el tiempu, pretendan facenos perdelu a les y los demás y despilfarren les perres de la so afiliación (y de les sovenciones que perciben) n’iniciatives tan reprobables como estes demandes.

Pa la CSI, digan lo que digan los direutivos de CSIF, el sindicalismu nun ye un negociu, les sigles sindicales nun son una marca comercial y los sindicatos tenemos que tar nos xulgaos, como tenemos que tar na cai, pa defender los drechos de les y los trabayadores y non pa maniobres de tan baxa estofa como ésta que mos ocupa.

En tou caso, estes sentencies son una excelente noticia pa les y los trabayadores y pal sindicalismu que pelea y nun traiciona y una sonora bofetada al sindicalismu amariellu y burocráticu.