Sofitu a les y los trabayaores de Comunicalia

Los más de 100 trabayaores del Grupu Comunicalia arrastren tres meses de impagos de les sos nómines.

Dende la Corriente Sindical d’Izquierda queremos amosar el nuesu incondicional sofitu a les y los más de cien trabayadores del grupu Comunicalia dedicaes y dedicaos a la comercialización e instalación de productos de la multinacional de telecomunicaciones Orange. Entamen movilizaciones en demanda’l pagu de les tres nómines que-yos adeuda la compañía.

Les y los empleaos de la compañía, allugada en Xixón, denuncien que Comunicalia acumula yá tres meses d’impagu de les nómines, si bien los retrasos e inregularidaes nos pagos vienen arrastrándose dende’l pasáu mes de marzu. Esa circunstancia vién provocando serios trastornos a les y los empleaos y les sos families, que en dalgún casu viéronse obligaes a recurrir a créditos bancarios pa poder facer frente a les sos obligaciones económiques.

La situación pa les y los trabayadores, -que se dediquen a la instalación de fibra óptica d’Orange y a la comercialización de productos de telefonía móvil y accesu a internet pa particulares y empreses de dicha multinacional-, volvióse insostenible, lo que-yos llevó a entamar una riestra de midíes de protesta que va dir concretándose nos próximos díes.