Énte la reciente fola d’incendios forestales

Énte la reciente fola d’incendios forestales la Corriente Sindical d ́Iquierda nel SEPA, Manifiesta.

En primer términu expresar les nueses condolencies a les families de les persones falecíes  y el nuesu más sinceru sofitu a toles persones damnificaes de Portugal, Llión, Galiza y, por  supuestu, Asturies.

Provócanos la mayor de les zozobres que’l tiempu mos dea la razón cuando en sede parlamentaria o na cai denunciamos que esta triba de fenómenos son cíclicos y previsibles pero les y los responsables políticos que deberíen prever y mitigar los efeutos d’estes situaciones nun escuchen y permanecen de brazos cruzaos esperando a que llueva.

La magnitú d’incendios como los de Busindre, Valedor, Bual-ElFranco o los de Degaña-Ibias d’estes feches desborden la capacidá de los medios del SEPA o incluso los de tou’l Principáu d’Asturies y, por supuestu, los de los conceyos implicaos.

Por embargu atristáyanos repetir que nun fae falta la conxura d’un furacán atlánticu acompañáu de vientu sursaharianu pa que’l SEPA quede desbordáu. El SEPA ye un serviciu d’emerxencies que vive sumíu na precariedá dende va demasiaos años y que nun tién visos de cambiu.

La CSI nel Sepa vién denunciando dende va casi una década –sí, diez años- que la plantila ye poca y que’l catálogu de puestos de trabayu nel Área d’Intervención nun tá cubiertu faltando alredor de 30 efeutivos d’una plantila de 350 deforma habitual.

Los turnos diarios intégrenlos una media de tres efeutivos por parque, repartíos en 19 parques. Les cifres son tan ridícules que sobra amestar cualesquier comentariu.

Pesie a que’l trabayu nel monte, n’accidentes de tráficu, n’incendios urbanos, etc, ye’l mesmu patoes y toos, esta alministración que sufrimos empéñase en caltener dos categoríes profesionales con un terciu de la plantilla en situación de “bomberos baratos”.

La solución a esti caos entendemos que nun pasa per apuntalar un serviciu a base d’hores extraordinaries que se cuenten por miles.

Tampoco tá en reclamar el sofitu de la UME como si del sétimu de caballería se tratare.

Nin muncho menos en clamar que la situación débese a un campu enllenu terroristes incendiarios.

Impónse coordinar midíes pequeñes que sumen y que contribuyan a que esto nun pase o, si pasa, nun algame la magnitú a la que yá paez que tenemos que avezanos.

Si amburiar el monte ye delitu, persígase y acótense los terrenos amburiaos pa que se rexeneren y el delincuente nun se vea premiáu.

Si l’arboláu ye un monocultivu d’especies pirófiles, diversifiquen los cultivos.

Si los caminos, puntos d’agua y cortafuegos tán sucios e imprauticables, inviertan en prevención.

Si l’organismu encargáu de la extinción lleva años tratando de ser escucháu, dén-y la voz.

Prestaríanos acabar sumándonos a las voces que en Galiza acusen a terroristes d’esta situación. Sí, son terroristes toes y toos aquelos que teniendo’l poder y les perres pa entamara solucionar estes situaciones nun lo faen por dexadez, intereses escuros o incapacidá.

Y eses y esos terroristes son, en sin dulda denguna, ustedes, les y los nuesos gobernantes, porque nun escuchan a les y los trabayadores, porque nun persiguen el delitu, porque nun planteguen alternatives al campu, porque’l mediu rural paez que se salva na más si llueve.

Uviéu 18 d ́ochobre de 2017.