Énte la so opulencia, la nuesa precariedá

Reservái fecha, 20 d’ochobre a les 17 h na plaza de la Escandalera d’Uviéu, concentración escontra los Premios Princesa. Nun queremos cuentos…

Recordái que un añu más tenemos que tar faciendo ruíu escontra los Premios Princesa. Nun queremos nin Reis, nin Princeses, nin Borbones, nin Fartones faciéndo-yos la corte. Son munches les inxusticies que vive la clase obrera asturiana y que nun creemos en cuentos. Nun queremos nin una monarquía nin una clase política corrupta y represora.

Mientres les clases privilexaes quieren dar una imaxen de normalidá y prosperidá el pueblu asturianu tién la obligación d’amosar l’Asturies real. Aquella na que 1 de cada 4 asturianes y asturianos tán na probeza o en riesgu d’ella, l’Asturies del 25% de desempléu crónicu, na que atopar un trabayu nun te asegura algamar una vida digna, na que les y los trabayadores perdieron el poder alquisitivu que tiníen demientres una minoría privilexada nun para d’acumular capital. L’Asturies na que la mocedá énte la falta d’expeutatives de futuru vése obligada a la migración, na que, a quien quedamos y lluchamos escontra estes y otres inxusticies mos reprimen.

Esa Asturies del deterioru de los Servicios Públicos y les privatizaciones en beneficiu d’unos pocos y poques, esa na que los drechos como pueblu, ca vegada más, vénse pisoteaos…

Anque tamién vamos glayar escontra les y los responsables del tratu que se-y da a la clase obrera migrante d’otres partes del mundu hacia l’Estáu Español. Persones varaes na frontera sur, y otres, onde nun se respeten los Drechos Humanos teniendo consecuencies vitales pa munches.

A lo mesmo, dexaremos claru’l Drechu d’Autodeterminación, el respetu a la bayura y multiculturalidá de los pueblos.

Por too esto y más, Premios Princesa non nel nuesu nome.