Comunicáu de la CSI escontra les agresiones de calter neonazi nes Fiestes de San Mateo

Dende la CSI queremos denunciar, una vegada más, les agresiones neonazis que se producen n’Asturies y facer un llamamientu a la clase obrera asturiana pa que se posicione escontra estes agresiones. Esta vegada la víctima foi un chaval de 20 años nes Fiestes de San Mateo, por llevar una camiseta de un grupu de música vascu.

Por llevar camisetes coles que tán en desalcuerdu, pol color de piel, pola orientación sexual, pol orixen, por ser probe y vivir na cai… son munches les razones poles que estos grupos de ultraderecha ataquen y agreden, la mayoría de les vegaes con impunidá.

Dende la CSI llevamos tiempu diciendo que cada día hai más agresiones neonazis n’Asturies, y preocupamos abondo la medra de la ideoloxía d’ultraderecha, inclusive dientro de la propia clase obrera qu’enantes de pellear escontra quienes explotan y escontra quienes faen lleis inxustes, peleen con quien tienen al llau, contra la mesma clase obrera.

L’individualismu, el salvese quien pueda aplastó la conciencia colectiva y día ente día vemos como lloñe de crear una sociedá xusta ya igualitaria los discursos d’odiu calen na sociedá y crecen les desigualdaes y les exclusiones, por supuestu, la mayoría les veces, cola complicidá de los medios comunicación que son responsables de crear opinión y dende los que vendense noticies manipulaes y repitense una y otra vez les mesmes cantineles pa calar nel imaxinariu colectivu: son pelees de tribus urbanes, ye pol alcohol o poles drogues, namás foi una pelea de chigre…NON, estes agresiones tienen calter socio-políticu, son agresiones fascistes basaes nel odiu.

Dende la CSI una vegada más condergamos estes agresiones y creemos que la manera de acabar con estos grupos ye posicionanos como sociedá a la escontra, y por supuesto la educación. Educar con valores d’igualdá y respetu. Educar pa construyir una sociedá que nin dende los medios de comunicación nin dende dengún sitiu permita comentarios y aiciones que denigren a les persones. Una sociedá na que ser diferentes nun seyan un problema sinon una oportunidá pa compartir y deprender unos d’otres.

Ayer, güei y siempre glayamos ¡ABAXO’L FASCISMU!