Fuelga xeneral en Catalunya

 

De magar el próximu día 3 d’Ochobre, los sindicatos de clase CGT, CNT, IAC y COS entamen fuelga xeneral en Catalunya escontra la represión y los retayos nos drechos y llibertaes de les y los trabayadores catalanes.

Dende la CSI nun mos queda otra que xuninos y sofitar solidariamente dicha convocatoria, entendiendo dicha movilización como:

– Una movilización pol drechu de la clase obrera catalana a decidir llibremente’l so futuru como pueblu. Dende la CSI siempre vamos sofitar el drechu d’autodeterminación de los pueblos, decidiendo qué son y cómo quieren organizase. Equí reside l’internacionalismu que tamién abanderamos como clase obrera asturiana.

– Una rempuesta a la maquinaria represiva que l’Estáu español punxo en marcha, movilizando nun sólo a los cuerpos y fuerces de seguridá, sinon a tou l’aparatu xudicial y mediáticu que dispón al so preste nun marcu d’auténticu réximen totalitariu. Énte la represión, la CSI amosóse siempre solidaria colos oprimíos y les oprimíes.

– Un actu de desobediencia pa con un sistema que escudándose nuna Constitución pactada nel añu 78, caltién los privilexos de les élites capitalistes en detrimentu de los intereses de la clase obrera de xusticia social y del repartu de la riqueza. La CSI amosóse siempre a la escontra de los Pautos de la Moncloa y del réximen del 78 y desobediente énte les lleis inxustes e impuestes.

– Una movilización pola defensa de los drechos básicos como son la llibertá d’expresión, el drechu d’aconceyar y de llibertá ideolóxica, viendo nestos últimos díes cómo toles fuerces represores, Guardia Civil, Policía Nacional y Mossos los vulneren sistemáticamente como si en Catalunya existiere un auténticu estáu d’exceición, con asaltos a edificios del Gobiernu catalán y de la sede de la CUP, incautándose de material altamente peligrosu como son les papeletes d’una consulta popular.

– Una movilización de sindicatos de clase, que una vegada más nun cuenta col sofitu de los sindicatos mayoritarios CCOO y UGT, faciéndonos dende equí eco del llamamientu de la sociedá catalana a que se xunan a la convocatoria de la fuelga xeneral pa tener un discursu que axunte l’interés de la clase obrera na so intención d’exercer llibremente’l so drechu a decidir.

Nesti marcu social y políticu, dende la CSI facemos un llamamientu a tola clase obrera asturiana a salir a la cai en toles movilizaciones que se faigan en defensa del drechu a decidir llibremente del pueblu catalán, entendiendo esti drechu non como una confrontación ente los gobiernos capitalistes españoles y catalanes, sinon como un drechu de los catalanes y les catalanes a decidir soberanamente’l so futuru sigún los sos propios anhelos de xusticia y llibertá, frente a la élite que únicamente defende la democracia pa caltener los sos intereses de poder y riqueza.

EL PROPER 1 D’OCTUBRE, ¡¡VOTAREM!!