Represión. Añu dos, Llei Mordaza

Cuando’l monopoliu de violencia del Estáu se impón parcial y arbitrariu, l’autodefensa ye tovía más llexítima.

Cúmplense dos años d’implantación “democrática” de la Llei de Seguridá Ciudadana, una llei coercitiva amás de regresiva no que cinca a derechos y llibertaes. Na so definición teórica preveíase yá totalitaria, y na so práutica demuéstrase illexítima.

Excusándose nel “orden social” y “seguridá ciudadana” lo que intenta consiguir ye reprimir el pensamientu diverxente, atacando cualesquier espresión de protesta, de denuncia, lo mesmo na cai o nes redes sociales, imponiendo un sistema punitivu que salvaguarde los intereses de la clase dominante en perxuiciu de les clases populares.

El nivel d’arbitrariedá ye talu que les «fuerces de seguridá» son xuez y parte pudiendo sancionar direutamente, basándose na so interpretación de los fechos ensin que medie un tercer ellementu. Esto dionos como resultáu sanciones que rocen lo absurdo, anque por absurdes igual de graves y que, como non, conlleven una sanción económica, lo que puede alendar tovía más l’abusu de poder.

Hestóricamente les conquistes de la clase obrera y la defensa d’éstes consiguiéronse cola organización de la nuesa clase y la llucha en tolos frentes. Una vegada más nun queda otra si queremos revertir les sos lleis y tolos ataques que tamos sufriendo nel terrén llaboral, económicu y social. Y eso ye lo que quieren parar coles sos lleis. Por embargu nin mos dan miéu nin vamos dexar de pelear.

Dende la CSI facemos un llamamientu al conxuntu la clase obrera a la organización, la llucha y la solidaridá escontra les lleis del Capital.

Énte la so represión, la nuesa solidaridá!!!