La CSI sofita les reivindicaciones de les y los músicos de Xixón

La Corriente Sindical d’Izquierda, énte los últimos acontecimientos asocedíos en Xixón, represaliando la música na cai, quier manifestar lo que vién darréu:

1.- L’exerciciu de l’actividá musical ye un derechu popular inrenunciable. El deprendimientu de los conocimientos y aptitudes musicales, lo mesmo de forma autodidacta que al traviés d’estudios reglaos, ye difícil y les persones que lu faen han combinalos, en munchos casos, col restu de xeres escolares o llaborales, lo que dificulta la so finalización. Nel casu de los estudios reglaos, la carrera musical tién una duración de catorce años. Causa tristura que dempués de dedicá-y años d’estudiu y dedicación, les persones que deciden facer de l’actividá musical una forma de vida dempués nun puedan exercer les sos aptitudes, al carecer d’infraestructures, (orquestes, bandes y/o auditorios), que-yos lo permitan.

2.- Nuna sociedá capitalista, el derechu a la cultura suel enfocase pa les élites, dexando al pueblu marxináu. Nun ye casual que los retayos educativos siempre entamen poles humanidaes y les artes.

3.- Va poco’l conceyal de Xixón, Esteban Aparicio, reprimió con delles multes y prohibiciones l’exerciciu de la música na cai, acoyéndose a una interpretación de la ordenanza municipal escontra’l ruíu. Ello ye, la música pa esti conceyal equival a ruíu. Sosprende que pa encima lo diga un conceyal que organiza un festival aéreu que ensordez a les y los xixoneses mientres dellos díes los últimos branos.

4.- De magar diches midíes represores, estremaes organizaciones, convocaes pola charanga Ventolín, movilizáronse pa desixir los cambios necesarios de la ordenanza municipal, consensuaos ente les partes afectaes, que combine equilibradamente’l derechu a la música y al descansu vecinal, lo mesmo pa actividaes callexeres que en llocales acondicionaos.

5.- Polo tanto, dende CSI sofitamos les movilizaciones que se faigan y vamos tar al lláu de les y los músicos de la ciudá, lluchando polos sos derechos, pa impedir que se reprima la música. Una ciudá ensin música ye una ciudá ensin identidá. La música apurre encantu y fortalez llazos sociales, contribuyendo a construyir una sociedá plural y participativa.