El Tribunal Supremo ratifica, una vegada más, la posición de la CSI sobre les demandes d’ex trabayadores del Plan d’Empléu de Xixónu

Esti llunes llegó a los servicios xurídicos de CSI la tercer sentencia emitía pol Tribunal Supremu referente a recursos de casación que nel so día interpunxo l’Ayuntamientu de Xixón escontra delles sentencies del Tribunal Superior de Xusticia d’Asturies que daben la razón a un grupu d’extrabayadores del Plan Inserta 2013-14 nes sos demandes de reclamación de diferencies salariales.

Alegaba nel so día l’Ayuntamientu que estes demandes carecíen de fundamentu, yá que esti grupu de denunciantes nun atacara nel so día’l so despidu, anque sí ficieron tiempu dempués reclamación y demanda por diferencies salariales. El criteriu de la Corriente Sindical d’Izquierda y de los sos servicios xurídicos siempre foi que ún y otru nun yéren vinculantes, y que los y les extrabayadores teníen plenu derechu a reclamar eses diferencies salariales independientemente del despidu improcedente. Tres ganar toles demandes nos Xulgaos de lo Social de Xixón y nel Tribunal Superior de Xusticia d’Asturies, la razón ratifícase una vegada más, con esta tercer sentencia favorable, de parte de la CSI al vese reconocía la so postura tamién nel Tribunal Supremu.

La sentencia llegada estos díes afecta a un solu trabayador que habrá cobrar 3.220 euros, lo que sumao a les dos sentencies recibíes con anterioridá y que afectaben a un total de 13 demandes, suma hasta’l momentu una cantidá superior a los 40.000 € que tendrá que desembolsar l’Ayuntamientu.

Dende la CSI denunciamos una vegada más la falta d’escrúpulos y de compromisu del Ayuntamientu hacia les y los sos ex trabayadores y hacia esti sindicatu. Nel so día, y a pedimimentu de los servicios xurídicos del Ayuntamientu, quedaron suspendíos dellos xuicios que afecten a ente 70 y 80 ex trabayadores del Plan d’Empléu 2013-14, a la espera de la decisión del Tribunal Supremu y col compromisu verbal pela parte los servicios xurídicos del Ayuntamientu de que, si les sentencies yéren favorables a les y los demandantes, procederíen al pagu inmediatu de les cantidaes que-yos adeudaben, que sumen un montu global d’ente 300.000 y 400.000 euros. Pesie a les sentencies favorables a les y los ex trabayadores, l’Ayuntamientu opta por reactivar los xuicios, lo que supondrá allargar l’agonía al tener que reactivase los xuicios, lo que supón meses d’espera pa la cellebración d’esos xuicios y más meses d’espera a la espera de la resolución d’esos xuicios y a que l’Ayuntamiento proceda al abonu d’eses futures resoluciones xudiciales.

Dende la CSI pidióse formalmente una reunión cola conceyala d’Empléu, Ana Braña, pa intentar axilizar los plazos y que l’Ayuntamientu emitiere una resolución alministrativa reconociendo la deuda colos y les ex trabayadores y procediere al pagu inmediatu. La CSI lleva esperando por una rempuesta a esti pedimientu formuláu’l pasáu 2 de xunu vía telefónica y corréu ellectrónicu.

Una vegada más queda de manifiestu’l nulu talante y falta d’humanidá del equipu de gobiernu, que mantién en vilo a casi un centenar de families de Xixón, a les que adeuda unes perres que, na mayoría los casos necesiten de manera urxente, al tratase de paraos y paraes de llarga duración y con unes necesidaes económiques y materiales que resolver.