Nuevu casu de represión y yá son demasiaos

Dende la Corriente Sindical d’Izquierda queremos amosar el nuesu sofitu y solidaridá, amás de condergar les detenciones arbritaries a les compañeres del Bloque Críticu.

Otru casu de represión más a la rempuesta socio-llaboral n’Asturies y yá son demasiaos.

Dempués del reaxuste del aparatu represor del Estáu Español énte la movilización polos derechos fundamentales de la clase obrera nos últimos años quedónos una realidá inaceptable.

Trabayadores condergaos/es por defender el so puestu de trabayu, sindicalistes deteníos/es arbitrariamente, detenciones d’activistes sociales por espresase a la escontra’l discursu establecíu, raperos, twiteres… la llibertá d’espresión y el derechu a manifestación nos los arrampuñaron.

Nesta ocasión dos persones fueron deteníes de manera aleatoria pa reprimir y someter al restu, queriendo criminalizar la protesta social de nun tolerar la intolerancia, amás d’intentar llexitimar el discursu regresivu y transfóbicu.

Piensen que vamos quedar callaes y sumises pero nun van consiguilo. La so represión, el so discursu discriminatoriu y la so cultura del odiu y el miéu dánnos más fuerza pa pelear xuntes escontra les inxusticies.

Pol derechu de nun tolerar la intolerancia

Énte la transfobia y la represión, SOLIDARIDÁ!!