Xuiciu-Concentración, Conflictu Cafeteríes de Viesques

XUICIU-CONCENTRACIÓN DE SOFITU: Llunes 29 de mayu a les 09:00, Xulgaos de Xixón, Asturies.

Una de les trabayadores de les cafeterías del campus tién xuiciu por reclamación de salarios que l’empresariu concesionariu de les cafeteríes tovía-yos debe.

Les trabayadores de les cafeteríes del Campus de Xixón continúen el conflictu que llevan padeciendo dende fae meses. Por embargu queremos compartir con vosotres y vosotros dalgunes novedaes que abren un camín pa esperar una solución:

D’un lláu, la Universidá quier sacar el concursu públicu, nos nuevos pliegos de condiciones que contendrán dos novedaes: modificaránse les clausules rellatives a los precios de los productos pa favorecer un incrementu de la calidá y alloñar a empreses ensin la suficiente solvencia y credibilidá. Amás, nun conceyu manteníu pela CSI y el Xerente de la Universidá, ésti comprometióse a incluyir explícitamente nos pliegos la subrogación obligatoria del personal que vinía trabayando hasta’l momentu.

D’otru, les trabayadores que siguen daes d’alta na Seguridá Social na empresa expulsada pola Universidá, metieron la demanda de despíu de manera que yá puedan tramitar el subsidiu de desempléu. Amás siguen coles reclamaciones de los salarios adeudaos y resérvense’l derechu de futures demandes contra cualesquier implicáu o implicada.

La Universidá tamién garantiza que pueda siguise col puestu solidariu nel Campus de Xixón pa que les trabayadores sigan siendo visibles y nun se escaeza’l so conflictu.
Too ello garantiza cierta tranquilidad y optimismu, anque conteníu, sobre lo que pueda pasar nel futuru. Agora namás esperamos que cuando salga’l concursu apaeza una empresa seria que se faiga cargu del serviciu y acabe esta pesadiella que lleva minando la moral y la salú de les trabayadores tou esti tiempo.

Si toque a una tóquennos a toes!!

Puxa la llucha les muyeres!!