Contracorriente nº 42

Dende que nel añu 2007 nos dixeron que tábemos en crisis, diéronnos como si nun hubiere un mañana. Con unes tases de paru que superaron el 25 %, según datos oficiales, con decenes de miles de persones que quedaron ensin casa, desamparaes, y ensin tener cubiertes les necesidaes básiques, l’Estáu nun foi quién a dar respuesta a los problemes. Sicasí, sí foi quién a caltener los privilexos d’unos pocos a costa del sacrificiu de munchos. Corrupción, oligarquía, esplotación, censura, prohibiciones, abusos, persecución, represión… son palabres asociaes a les dictadures y son palabres qu’una vez y otra se repitieron de contino,cuestionando l’actuación d’unos Estaos, en teoría democráticos, pero que na práctica tán parasitaos pa salvaguardar los intereses d’una minoría, anque la titularidá del poder correspuenda a tola sociedá.

 

Delantre d’una situación tan inxusta lo raro sería que’l descontentu social nun aumentaresignificativamente, tratando de contrarrestalu l’Estáu con un endurecimientu de la llexislación que regula’l derechu a la protesta, qu’al efectu traduzse nun aumentu de les multes a la xente que se manifiesta, identificaciones inxustificaes, malos tratos a manifestantes y deteníos, encorsetamientu de la llibertá d’espresión y intentos de criminalización d’aquelles organizaciones que nun tán dispuestes a dexar que se violente’l derechu llexítimu a esixir que les persones podamos participar na vida civil en condiciones d’igualdá y ensin discriminación nenguna, daqué qu’agora nun ta garantizao.

 

L’Estáu respondió col usu de la fuercia, la criminalización y l’acosu xudicial ante persones que demanden dalgo tan esencial como un sitiu onde vivir o un trabayu. L’Estáu acosó y acosa a aquellos que lluchen polos derechos de toos y toes. Usó la represión, tolo contrario de llibertá. Una llibertá que-y arrampuñaron a Alfon, a Andrés Bódalo o que queríen quitar al compañeru Aitor, felizmente absueltu. Ellos, y otres munches persones que permanecen nel anonimatu, lluchen tolos díes por una vida más xusta pa tol mundu y reciben como pagu, en demasiaos casos, l’olvidu. Nun podemos dexar qu’eso pase, tenemos la obligación moral, per enriba de too, de sumar fuercies pa evitar que situaciones como estes puedan dase.