Concentración d’apoyu a les compañeres despedíes de Modultec

Llunes 22 de Mayu a les 16:00 h, delantre del Institutu Asturianu de la Muyer, C/ Eduardo Herrera "Herrerita", s/n, Uviéu.

Dende Muyeres en llucha CSI facemos un llamamientu a participar na concentración d’apoyu coles compañeres despedíes de Modultec. Estes compañeres denunciarán ente l’Institutu Asturianu de la Muyer, la discriminación sufrida por razón de sexu na empresa, denuncia a la que los tribunales dan la razón, primeru’l Tribunal Superior de Xusticia d’Asturies que sedrá ratificáu darréu pol Tribunal Supremu, reconociendo la discriminación por razón de sexu, amás de la discriminación sindical.

Recordemos que l’Institutu Asturianu de la Muyer ye’l “muérganu del Gobiernu d’Asturies responsable de facer efectivu’l principiu d’igualdá ente muyeres y homes, impulsando y promoviendo la participación de les muyeres en tolos ámbitos y eliminando cualesquier forma de discriminación”.

Poro les compañeres pidieron una reunión cola directora d’esti muérganismu, pa dexar constancia de la discriminación que por ser muyeres vienen sofriendo na empresa Modultec. La mesma que, xunto a la Fundación del Metal, utilizó la contratación de muyeres, ente elles les nuestres compañeres, vendiendo la so incorporación a sectores tradicionalmente considerados masculinos como un avance social pa cobrar suvenciones del Gobierno d’Asturies, pero una vez cobraes fue a les primeres que despidió. Que casualidá que nel ERE (Espediente de Regulación de Empléu) del 2015 fueran despedíes 12 de las 16 trabayaores.

Esta empresa tien tanta cara y siéntese tan intocable qu’Incluso anguañu na so páxina web http://www.modultec.es/rsc/, na sección “Compromiso con las personas” podemos ver la semeya onde salen les nuestres compañeres. Ye dicir, que dempués de despediles siguen utilizando la so imaxen pa dase publicidá. Esto significa que por un llau nun se respeten los sos drechos llaborales, sindicales nin les lleis d’igualdá, y por otru que se-yos cosifica y utiliza como obxetos, mero “atrezzo” pa una semeya, beneficiándose asina de la imaxen de les compañeres.

Les muyeres tamos cansaes del machismu, nesti casu llaboral. Tamos cansaes de ser convertíes n’obxetos, de breches salariales (dalgunes encubiertes teniendo’l mesmu sueldu pero cobrando los homes más al unise a ésti incentivos y promociones nes que queden excluyíes les muyeres , de tener una mayor precariedá ya inestabilidá, tener más dificultá pa ser contrataes, y ser les primeres en ser despedíes porque, ente otres razones el nuestru salariu sigue considerándose secundariu, d’acosos y abusos, de dobles y triples xornaes, y un llargu etc.

Poro’l llunes denunciaremos de nuevu esti casu de machismu llaboral y pedímosvos que mos sofitéis pa ente toes y toos facer visible la discriminación y la falta d’igualdá real. Tan mui bien los papeles y les campañes publicitaries pero nosotres desiximos fechos, desiximos que se respeten los nuestros derechos como muyeres y como obreres.

Basta ya de machismu llaboral.

Tóquennos a una, tóquennos a toes.