Primeru de Mayu

1º DE MAYU

Dende la Corriente Sindical d´Izquierda queremos denunciar una vegada más, que tamos siendo oxetu de la mayor ofensiva escontra la clase obrera dende fai décades.

Pero hai que recordar, que la Hestoria del 1º de mayu, dende Los Mártires de Chicago hasta güei, ye la hestoria de la organización de les y los trabayadores, y de les clases populares pa enfrentase al capitalismu… al capitalismu y al so proyeutu económicu y social, basáu na inxusticia, la codicia y l’ambición de les y los más poderosos.

La Hestoria del 1º de mayu ye la HESTORIA del sindicalismu combativu… esi sindicalismu que pelea polos derechos de la clase obrera y por un mundu más xustu y más humanu, usando ferramientes que fueron pasando de xeneración en xeneración y que nun son otres que la xunión ente les y los trabayadores, la concencia de clase, la solidaridá coles y los que lluchen y l’apoyu mutuu.

Poro, nun día como ésti, tenemos que nos comprometer a siguir perseverando na pelea.

En cada empresa y en cada barriu.

Na llucha de les persones desempleaes, de les muyeres, de los y les pensionistes, de la mocedá que se ve abocada a emigrar a la gueta d’esi futuru dignu que se-yos niega dientro’l so propiu país…

Hai que siguir lluchando escontra la precariedá, escontra les privatizaciones, escontra la supresión y el deterioru de los servicios Públicos… escontra los despidos, los ERES, los retayos… porque les grandes empreses del Estáu español repartiéronse millones y millones ente’l so accionariáu dende que entamó la crisis y, frente a eso, tenemos como resultáu que 1 de cada 4 habitantes d’Asturies tá na probitú o en riesgu de padecela.

Escontra’l deterioru de les nueses vides por mor de la contaminación criminal que namás busca’l máximu beneficiu pa dalgunes multinacionales a costa la nuesa salú…

Escontra la sangrina, vergoñosa e indecente corrupción que colapsa les nueses vides y que tá perafitada en tolos órdenes institucionales: na Corona, nel poder políticu, nel xudicial… Hai que lluchar escontra esa corrupción que mos emprobrez acaldía un poco más y que saquea, ensin escrúpulu dengún, lo que tantu esfuerzu costó algamar col nuesu trabayu…

Escontra la desigualdá salarial ente homes y muyeres… escontra la violencia de xéneru, enraigonada nesa educación machista afalada na cultura patriarcal na que vivimos… ¡¡porque nos tán matándonos!!… ¡¡tán asesinándonos!! mientres los gobiernos miren pa otru lláu, como si la vida d’una muyer, fuere una vida de segunda…

Escontra’l facismu imperante y les sos ramificaciones… escontra la LGTBfobia, escontra’l racismu que zarra fronteres…

Hai que lluchar contra les lleis corruptes y xenocides, como la Reforma Llaboral, cola que tán lliquidando l’empléu estable, los salarios dignos y los derechos llaborales…

Escontra la represión a la protesta social mediante la Llei Mordaza, que nos quieren callaos y acobardaes mientres nos quiten TOU DAFECHU delantre les nueses ñarres…

Dende la Corriente Sindical d´Izquierda vos convidamos a dar la llucha en tolos frentes posibles, pero fundamentalmente na cai…

Nun podemos escaecer que tolos grandes cambios sociales y toles conquistes de la clase obrera algamáronse na cai, gracies a les protestes y a les movilizaciones.

Asina que hai que xiringar el desánimu, la desgana y el pesimismu, pa quitanos la sensación de derrota d’enriba…
Tenemos que siguir saliendo a la cai, sumando acaldía a más xente y con más ánimu… col convencimientu de que tenemos la razón y, que si resistimos agora a esta brutal ofensiva del Capital y de les y los sos lacayos políticos, tamos preparando’l camín pa avanzar na recuperación de los derechos que tán arrebatándonos, y na construcción d’un futuru más prósperu y dignu pal Pueblu.

Porque-y lo debemos a quienes nos precedieron en momentos muncho más duros que éstos.

Porque-y lo debemos a quienes nel futuru van pelear usando les mesmes idees d’igualdá y de xusticia que güei y equí reivindicamos.

Y porque debémonoslo a nós mesmes y mesmos, y a la nuesa dignidá como seres humanos y como clase trabayadora.

¡PUXA LA LLUCHA DE LA CLAS OBRERA!

¡PUXA LA LLUCHA DE LES MUYERES!

¡PUXA EL PRIMERU DE MAYU!