Pol futuru de los puestos de trabayu en Modultec-Grupu Imasa

Martes 18 d'abril 2017, a les 11:00, Xulgaos de Xixón, Asturies.

Escontra ERES y despidos

Xuiciu-Concentración de sofitu

A finales del pasáu mes d’avientu, remató’l ERTE a valir dende marzu de 2015 pa tola plantiya de Modultec (grupu Imasa), coincidiendo cola declaración de concursu d’acreedores.

A dichu ERTE siguiólu, en xunetu de 2015, un ERE d’Estinción pol que fueron despidíos 42 trabayadores (d’un total de 92).

El xulgáu de lo Mercantil de Xixón declaro nulu’l despidu de trés trabayadores afiliaes a la CSI, que, según dichu xulgáu, fueron despidíes pola so actividá sindical.

Darréu, el TJSA, en xunu de 2016, declaró nulu’l despidu de los 24 trabayadores qu’impugnaren l’ERE, dictaminó que nun esistió un criteriu oxetivu na selección de les trabayadores a despidir y que la causa del despidu de les muyeres foi la discriminación por razones de sexu. Amás, confirmó la nulidá del despidu de les trés compañeres de la CSI que dictaminara’l Xulgáu de lo Mercantil.

Agora, a puntu de rematar el ERTE a valir dende marzu de 2015, el trabayadores de Modultec volvemos atopanos na mesma situación que nos llevó al ERE d’estinción, ensin recibir nengún tipu d’información, nin per parte de la dirección, nin per parte del Comité d’Empresa, onde UXT y CCOO caltienen el mesmu silenciu cómpliz que n’anteriores ocasiones, marxinándonos totalmente a quien, cola so firma, fuimos despidíos y tuvimos qu’engarrar pa recuperar los nuesos empleos na empresa demostrando que los nuesos despidos fueron inxustos ya illegales.

Recordamos, una vegada más, que tres la so fundación y puesta en marcha en 2002, Modultec recibió ayudes europees, estatales, autonómiques y municipales, ente elles subvenciones pa la contratación de muyeres. Mientres más d’una década la carga de trabayu foi considerable y la plantilla llego a tar formada por aprosimao trescientos trabayadores.

A partir de 2010, foise amenorgando’l númberu d’empleos fixos en favor de la subcontratación. Aínda en 2014, añu previu a declarase en concursu d’acreedores y a promover un ERTE y un ERE con 42 despidos, Modultec declaró más de 40.000 hores estras y cuntó con más de 40 eventuales.