Fuelga n’educación: O lo paráis, o paramos

Xueves 9 de marzu 2017

EL 9 DE MARZU VINIENTE, FUELGA EDUCATIVA. ¡LA LLUCHA TA NA CAI!

POR UNA EDUCACIÓN DE CALIDÁ, ONDE’L TIEMPU SEYA PA EDUCAR

18H LLECTIVES YA

Acordies col RD 14/2012 de 20 d’abril de midíes urxentes de racionalización del gastu públicu nel ámbitu educativu y dientro d’una clara campaña de retayu contra la escuela pública, el gobiernu del Partíu Popular modificó sustancialmente les condiciones de trabayu del profesoráu de secundaria al introducir nel horariu de dedicación selmanal 2 hores adicionales de calter llectivu. La Conseyería d’Educación de Asturies añedió a esa medra una paralela de 2 hores más de permanencia nos centros, quedando dichu horariu en 27 hores selmanales (anque nun venía esixíu pola norma estatal y nun foi enllantáu n’otres CC.AA.).

La carga de trabayu crecío non yá pol efectu d’eses dos hores llectives adicionales, tamién provocó un aumentu de la relación alumnáu/profesoráu y eso implicó una mayor dedicación d’hores nel centru de trabayu de computu mensual (hores reales anque artificialmente nun se reflexaron nos nuevos horarios) y d’hores ensin realizarVolver a línea automática
nel centru de trabayu. Más clases que preparar, más esames que correxir, más faltes, más families, más xuntes d’equipos docentes, más sesiones d’evaluación, más trabayu en cuentad’un sueldu menguante. Sueldu retayáu, conxeláu o de crecedera inferior al IPC.

LA CALIDÁ EDUCATIVA RESIÉNTESE

La calidá educativa resiéntese. Pidise a los y les docentes que dediquemos un mayor esfuerzu p’atender una peor situación nes aules porque nun escaezamos que la sobrecarga llectiva dase nun contestu de crisis y retayos educativos. Tenemos 2 hores llectives más y, al tiempu, aumentu de la ratio por aula, retrasu nes sustituciones ya introducción d’una nueva llei orgánica que nos pon les coses entá más difíciles (una nueva organización del currículu, materies nueves a preparar, programaciones con un formatu distintu y complicáu…). Esto inflúi negativamente nel procesu d’enseñanza aprendizaxe yá que que’l profesoráu tien menos tiempu real nos centros pa poder atender les necesidaes educatives del alumnáu.

PERDA SALARIAL

Otra de les consecuencies d’aquel retayu foi la perda salarial de los contratos a tiempu parcial. Les medies xornaes, qu’en Asturies suponen la tercer parte de los contratos d’interinidá, medraron espectacularmente en secundaria y la sobrecarga llectiva supunxo pasar de 10/18 del sueldu (55,56%) a 10/20 del sueldu (50%). Sueldos de 1000 € que se quedaron en 900 € esa foi la realidá pa cientos de collacios y collacies.Volver a línea automática
Agora que’l gobiernu diz que la recuperación aportó y que los beneficios empresariales tán a niveles precrisis, toca que los trabayadores y les trabayadores entamemos la engarradiella por recuperar lo perdío. Na enseñanza toca que demandemos la reversión de los retayos más duros que sufrimos y unu d’ellos foi ésti, el de la sobrecarga de trabayu.

Yá nel primer cursu de los nuevos horarios hubo comunidaes como Castiella Llión qu’apangaron aquello cola considerancia de 1 hora de guardia como llectiva y eso pudo facese tamién n’Asturies. Si nun foi asina, foi por voluntá política del gobiernu del PSOE y porque nun lo lluchamos.

N’Andalucía, el BOJA acaba de publicar lo siguiente “el restablecimientu de les 18 hores de la parte llectiva de la xornada selmanal del personal docente, … va llevase a cabu amenorgando una hora llectiva nel cursu escolar 2017-2018 y otra hora nel cursu escolar 2018-2019”.

Los retayos fueron inmediatos y el reestablecimientu fiase a dos años vista. Ye más que lo que nos ufierta’l conseyeru d’educación d’Asturies, pero nós nun nos conformamos con plazos.

TOCA SALIR A LA CAI PA DEFENDER LOS NUESOS DERECHOS Y RECUPERAR LO PERDÍO COLA MESMA PRIESA COLA QUE NOS LO QUITARON. PORQUE, SEÑOR CONSEYERU, O LO PARÁIS, O PARAMOS.