Concentración: Pola disolución de GISPASA

Llunes 6 de marzu 2017, a les 11:00 h, Xunta Xeneral del Principáu,c/ Fruela, 13, Uviéu, Asturies.

Pola disolución de GISPASA

El 6 de marzu comparecen na Xunta Xeneral del Principáu los artífices de la creación de GISPASA y de qu’esta se caltenga anguaño (Vicente Álvarez Areces (ex presidente del Principáu d’Asturies), Faustino Blanco González (ex Conseyeru de Sanidá), Jaime Rabanal (ex xerente de la Área IV), ente otros.

L’orixe de too esto remóntase a marzu del 2014, cuando s’aprobó nel parlamentu d’Asturies, la propuesta de disolución de GISPASA. Votaron a favor tolos grupos políticos sacante’l PSOE. El 28 d’ochobre del 2015 publícase nel Boletín Oficial de la Xunta Xeneral del Principáu la proposición de Llei pa la supresión de GISPASA.

¿Pero… qué ye GISPASA?

Ye’l mediu pol cual la Conseyería de Sanidá privatiza Servicios Sanitarios y Non Sanitarios pertenecientes al SESPA.

Xestión d’Infraestructures Sanitaries, S.A. ye una empresa pública” rexida con derechu priváu, foi creada pa la construcción de dos nuevos hospitales; HUCA-Uviéu y Álvarez Buylla-Mieres.

Dempués de los retrasos, dellos años, na entrega de les obres y los sos sobrecostos, nel HUCA el 58% del presupuestu inicial, nun se llinda o desapaez sinón qu’aumenta’l so pesu dientro del SESPA, quedándose a xestionar los nuevos hospitales.

¿Cuálos son les sos consecuencies?

Xestiona dineru públicu faciendo; compres de too tipu, dotando los hospitales d’equipamientos y moblame, licita o meyor dichu privatiza servicios… tou esto lo realiza ensin los controles, anticorrupción, propios a los que ta suxeta una empresa pública.

El personal direutu de GISPASA nun pasa per los mecanismos de contratación de lo público; Igualdá, meritu, capacidá y publicidá.

Falta de tresparencia en diches xestiones.

Duplicidad de puestos direutivos y de mandu, yá que, el SESPA tien la so estructura propia d’Alministración y Servicios Xenerales, que son quien s’encarguen de “les sos” funciones en el restu d’Árees nes qu’inda nun tien presencia GISPASA.

Faise cargu de llocales comerciales, cafeteríes, aparcamientos… y de los sos beneficios, pero a ónde van esos beneficios…

En definitiva tase introduciendo la lóxica capitalista cola escusa de la competitividá y el falsu aforru na Sanidá Pública. Quieren tresformar el Serviciu Sanitariu, de toos y toes, nel Negociu Sanitariu, en beneficiu d’unos pocos.

Les movilizaciones de lxs trabajadorxs denunciando la situación que se vivía nel HUCA, son una de les causes poles que se ta aldericando la disolución de GISPASA nel Parlamentu. De toes formes, eses acciones nun tienen de quedar nel pasáu, hemos de siguir movilizándonos ya que GISPASA sigue nel HUCA parasitando la sanidá pública.

ENSIN MOVILIZACIÓN NA CAI NUN HAI DISOLUCIÓN DE GISPASA